Qańtar oqiǵasyna qatysty 514 kúdikti adam qamaýda otyr. Bul týraly QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Jalpy qańtar oqiǵasy boiynsha sotqa 392 qylmystyq is joldanyp, ol boiynsha 445 adam sottaldy. Bilik ókilderine qarsy kúsh qoldanyp, múlikterdi joiýǵa bailanysty aýyr qylmysty jasaǵan, zalaldy ótemegen jáne ótelmegen sottylyǵy bar 46 sottalýshy bas bostandyǵynan aiyrýdyń naqty merzimine sottaldy. Qazirgi ýaqytta 514 kúdikti qamaýda», - dedi ol Ortalyq kommýnikatsiialar qyzmetindegi brifing barysynda.
Onyń aitýynsha, atalǵan adamdar qiratýǵa, ǵimarattardy órteýge, atys qarýlaryn jymqyrýǵa, memlekettik obektilerge jáne qurylymdyq kúsh qyzmetkerlerine shabýylǵa belsendi túrde qatysqan.
Árbir qamaýǵa alynǵan adamnyń qylmysqa qatysy bar-joǵy jóninde jetkilikti málimetter bar.
Olardyń bárine qorǵalý quqyǵy, sanitarlyq normalar, tamaqtaný, dári-dármek jáne ustaýdyń tiisti jaǵdailary qamtamasyz etilgen.
«Jeke basyn, densaýlyq jaǵdaiyn jáne basqa da mán-jaidy eskere otyryp, 284 adamnyń qamaýda ustaý sharasy eshqaida ketpeý týraly qolhatqa, kepilge, úiqamaqqa jáne jeke kepilgerlikke aýystyryldy», - dedi Bas prokýratýra ókili.
