Biyl qańtarda bolǵan jappai tártipsizdik kezinde qaza bolǵan jáne zardap shekken jandardyń tizimi shamamen qashan jariialanatyny belgili boldy, dep habarlaidy QazAqparat.
«Biz qańtar oqiǵasynda qaitys bolǵandar máselesin protsess bastala sala kóterdik. Búginde bul másele kún tártibinen túsken emes. Qaitys bolǵandardyń tizimine kelsek, Bas prokýratýranyń málimetine sáikes, tergeý aiaqtalýy kerek, tizim sodan keiin ǵana jariialanady. Bizdiń oiymyzsha, jekelegen aimaqtar boiynsha tergeý nátijesi belgili ekenin eskere otyryp, qaitys bolǵandar men zardap shekkenderdiń tizimin kezeń-kezeńimen jariialaǵan durys bolar edi. Biraq men úshin mańyzdysy tizim ǵana emes. Ondaǵy adamdardyń mártebesi, ólimniń sebebi týraly aqparat birge berilýi mańyzdy. Sondyqtan qur tizimdi jariialap qana qoimai, adam óliminiń sebebi men oǵan kim kináli ekendigi týraly da aitý kerek», - dedi adam quqyqtary jónindegi ýákil Elvira Ázimova ortalyq kommýnikatsiialar qyzmeti alańynda ótken dóńgelek ústel barysynda.
Sondai-aq, ýákil Bas prokýratýradan qańtar oqiǵasy kezinde qaitys bolǵan jáne zardap shekkenderge qatysty tizim men tolyq aqparatty talap etetinin aitty.
Atalǵan jaitqa qatysty QR Bas prokýratýrasynyń normashyǵarmashylyq qyzmetti úilestirý departamentiniń basshysy Almaz Muhamedjanov túsinik berip ótti.
«Birinshiden, qylmystyq isterdi tergeý merzimi shekteýli. Iaǵni qylmystyq is júrgizý kodeksinde tiisti shekteýler bar. Meniń oiymsha, qazir qańtar oqiǵasyna qatysty qylmystyq ister máresine jetip qaldy. Qajetti saraptamalar da aiaqtalýy kerek. Kópke sozylmaidy. Múmkin, osy toqsanda naqty aqparat bolyp qalar. Ol týraly bizdiń resmi ókilderimiz qoǵamǵa jetkizedi. Aqparat tek qaza tapqandar men zardap shekkenderge ǵana emes, barlyq qylmystyq iske qatysty», - deidi ol.
