QR Bas prokýratýrasy usynǵan statistikaǵa sáikes qańtar oqiǵasynan keiin tergeýge alynyp, onyń barysynda azaptalyp ólgen adam sany - altaý. Degenmen QR Adam quqyqtary jónindegi ýákili Elvira Ázimova azaptalyp mert bolǵandar sany odan da kóp ekenin aityp otyr, dep habarlaidy QazAqparat.
Buǵan deiin Bas prokýratýra qańtar aiyndaǵy oqiǵalar barysynda 238 adam qaitys bolǵanyn habarlady. Onyń arasynda 6 adam azaptaý saldarynan mert bolǵan.
QR Adam quqyqtary jónindegi ýákili Elvira Ázimova ortalyq kommýnikatsiialar qyzmeti alańynda ótken shara barysynda azaptaýdan 8 adamnyń qaitys bolǵanyn rastady.
«Biyl 14 naýryzda Parlamentte qańtar oqiǵasy boiynsha tergeýdiń nátijesi men barysy týraly birlesken tyńdaý boldy. Lańkestik aktilerge kimder qatysty, qansha adam qaitys boldy - munyń bári barshamyzdy tolǵandyrady. Biraq tergeýdiń jalǵasyp jatqanyn este ustaǵan jón. Degenmen, bul quqyq qorǵaý organdary men sotty azamattardyń quqyǵyn saqtaý jáne qorǵaý mindetinen bosata almaidy», - dedi Elvira Ázimova OKQ alańynda.
«Naýryzda qańtar oqiǵasy kezinde 8 adamnyń azaptan ólgeni aityldy. Al taiaýda Bas prokýratýra brifing barysynda zańsyz kúsh qoldaný saldarynan qaza tapqan 6 adamnyń bar ekenin rastady. Bul sondai-aq qoǵam belsendileri men táýelsiz qatysýshylardan alǵan aqparatqa sáikes keledi», - deidi ol.
Odan bólek, ombýdsmen qańtardaǵy oqiǵalardan keiin qansha adam azaptaýǵa ushyrady degen saýalǵa jaýap berdi.
«Qazir naqty sany belgisiz. Sebebi ótinish áli de túsip jatyr. Eger qańtardyń ortasynda 10 shaqty qylmystyq is qozǵalsa, keiin onyń sany 100-ge jetti. Qazir odan da kóp. Protsess barysynda sandar ózgerip jatyr. Sondyqtan ázirge sońǵy ári naqty san týraly aitýǵa áli erte», - dep túsindirdi Elvira Ázimova.
