Qyrǵyzstannyń quqyq qorǵaý organdary Almatyda qańtar oqiǵasy kezinde ustalǵan mýzykant Vikram Rýzahýnovtyń azaptalýyna qatysty isti tergeýdi aiaqtady. Materialdar Qazaqstanǵa jiberilmek. Bul týraly Rýzahýnovtyń ózi Facebook-tegi paraqshasynda jazdy, dep habarlaidy Ulysmedia.kz portaly.
"Sarapshylar meniń densaýlyǵyma aýyr ziian keltirildi dep baǵalady. Jinalǵan materialdar Qyrǵyzstannyń Bas prokýratýrasy arqyly kináli tulǵalardy anyqtaý jáne qylmystyq jaýapkershilikke tartý úshin Qazaqstannyń quzyretti organdaryna jiberiletin bolady", — dedi ol.
Aita keteiik, Qazaqstandaǵy qańtar qyrǵyny kezinde Qyrǵyzstannyń 10-ǵa jýyq azamaty ustalyp, bosatylǵan. Olardyń arasynda belgili qyrǵyz mýzykanty Vikram Rýzahýnov ta boldy.
Aqpanda Qyrǵyzstan prokýratýrasy mýzykantyń azaptalýyna bailanysty qylmystyq is qozǵalǵanyn málimdegen.
