Aqtóbe oblysyndaǵy Qandyaǵash stantsiiasynda vagon qaraýshy-jóndeýshiler Serik Nuranov pen Almatjan Amanjolov júk vagondaryn tekserip, tehnikalyq qyzmet kórsetý barysynda dóńgelek diskisinen syzat tapty, bul óte kúrdeli aqaýǵa jatady, dep habarlaidy "Ult aqparat" «Qazaqstan temir joly» UK«AQ baspasóz qyzmetine silteme jasap.
Vagon jeke menshik iesine tiesili. Dóńgelek juptar 1990 jyly jasalǵan. Aqaý tabylǵan soń atalǵan menshik iesiniń vagondary erekshe baqylaýǵa alyndy.
Vagonǵa júk tielgenin jáne dóńgelek juptarǵa salmaq túskenin eskersek, vagon qaraýshy-jóndeýshilerdiń qyraǵylyǵy júk tielgen búkil quramdy jolda bolýy múmkin úlken bir apattan saqtap qaldy deýge bolady.
Serik Nuranov pen Almatjan Amanjolov – tájiribeli temirjolshylar, óz isiniń bilgirleri.
Serik Nuranov temirjolda 30 jyldan beri jumys isteidi, sonyń 28 jylynda osy bir mekemede, iaǵni Qandyaǵashtaǵy tehnikalyq qyzmet kórsetý qosynynda qyzmet etip keledi. Aldymen jyljymaly quramdy jóndeý boiynsha slesar bolsa, 2006 jyldan beri vagon qaraýshy-jóndeýshi qyzmetinde.
Almatjan Amanjolovtyń temirjoldaǵy jalpy eńbek ótiline 30 jyldan asty. Osy jyldar ishinde ol Qandyaǵash tehnikalyq qyzmet kórsetý qosynynda eńbek etip keledi. Jumysyn moiyntirekti jóndeý boiynsha tokar bolyp bastap, keiin vagon qaraýshy-jóndeýshi qyzmetine aýysqan.
