Qandastar elimizdiń joǵary oqý oryndaryna Ulttyq biryńǵai test tapsyrmai túse alady. Bul jaiynda QR Premer-Ministriniń orynbasary Eraly Toǵjanovtyń Májilis depýtattary saýalyna bergen jaýabynda aitylǵan, dep habarlaidy QazAqparat tilshisi.
«Zańnamaǵa sáikes bilim berý granttary Ulttyq biryńǵai testileýdiń (budan ári – UBT) nátijelerine sáikes bilim berý baǵdarlamalarynyń naqty toptary boiynsha konkýrs negizinde beriledi. Búgingi kúni qandastar úshin memlekettik bilim berý tapsyrysynyń jalpy kóleminiń 4 paiyzyy (2265 grant) mólsherinde joǵary oqý oryndaryna túsý úshin qabyldaý kvotasy kózdelgen. Osy kvota aiasynda 2012 jyldan bastap 2021 jylǵa deiin 8 000-nan astam qandas qabyldandy. 2020 jyldan bastap joǵary bilimge qoljetimdilikti keńeitý maqsatynda qandastar úshin UBT alǵash ret elektrondy formatta uiymdastyryldy. Ol testileýdi qashyqtan shetelde tapsyrýǵa múmkindik berdi», - dep atap ótedi vitse-premer jaýabynda.
Onyń dereginshe, biyl onlain testileýge 1 143 qandas qatysty, 796 qandas nemese UBT-ǵa qatysýshylardyń jalpy sanynyń 69 paiyzy bilim grantyn aldy. Ótken jyly bul kórsetkish 76 paiyz deńgeiinde boldy
«2020 jyldan bastap SAT, AST jáne IB halyqaralyq standarttalǵan testileriniń baldaryn UBT baldaryna aýystyrý engizildi. Atalǵan sertifikattary bar adamdar UBT tapsyrýdan bosatylady. Tiisinshe, standarttalǵan test sertifikattary bolǵan jaǵdaida qandastar JOO-ǵa UBT-syz túsýge múmkindigi bar», - dedi ol.
Eraly Toǵjanov 2020 jyldan bastap diaspora ókilderi UBT tapsyrmai JOO-ǵa daiyndyq bólimderine qabyldaýdyń bekitilgen qaǵidalaryna sáikes áńgimelesý nátijeleri boiynsha qabyldanatyndyǵyn atap ótedi.
«Jyl saiyn joǵary oqý oryndarynyń daiyndyq bólimderine memlekettik stipendiiamen jáne jataqhanalardaǵy oryndarmen qamtamasyz ete otyryp, Qytai, Ózbekstan, Mońǵoliia, Resei, Tájikstan jáne Túrkimenstannan 1000-nan astam qandas qabyldanady. Daiyndyq bóliminiń baǵdarlamasy boiynsha qandastar qazaq tilin, jalpy bilim berý pánderin oqidy, UBT-ǵa tolyqqandy daiyndyq kýrsynan ótedi», - dedi Úkimet basshysynyń orynbasary.
