Batys Qazaqstan oblysynda «Qamqorlyq» balalardy ońaltý ortalyǵy ashyldy, dep habarlaidy "Ult aqparat".
Nursultan Nazarbaev qorynyń direktory, QR Parlamenti Májilisiniń depýtaty Dariǵa Nazarbaeva jumys saparymen Batys Qazaqstan oblysyna keldi.
Óńirge sapary aiasynda depýtat Batys Qazaqstan oblysy ákimi Ǵali Isqalievpen birge birqatar áleýmettik mańyzy bar nysannyń qyzmetimen tanysty.
Sapar Oral qalasyndaǵy oblystyq kópbeiindi balalar aýrýhanasynyń janyndaǵy erekshe qajettilikteri bar «Qamqorlyq» balalardy ońaltý ortalyǵyn aralaýdan bastaldy.
Jańa ortalyq jylyna 600-ge jýyq balany qabyldaidy.
Munda birqatar qyzmet kórsetiledi. Atap aitqanda, dárigerler keńesi, mehanoterapiia, emdik dene shynyqtyrý (kinezoterapiia), sensorlyq jáne interaktivti bólmelerde logopedterdiń, defektologtardyń, psihologtardyń, ergoterapevterdiń sabaqtary, balneoterapiia, fizioemdeý jáne t. b.
Aimaqtarda mundai ortalyqtar ashý Elbasynyń bastamasy boiynsha júzege asyrylady. Qazirgi tańda Almaty, Atyraý, Batys Qazaqstan, Shyǵys Qazaqstan, Túrkistan, Jambyl, Qostanai oblystarynda jáne Nur-Sultan qalasynda 8 ortalyq bar. Jyl sońyna deiin taǵy 10 ortalyq ashylady.
- Biz ońaltý ortalyǵyna óte rizamyz. Jyl on eki boiy osynda kelemiz. 8 jastaǵy ulyma bári unaidy. Ol erekshe yntamen jattyǵady. Jyl saiyn elordaǵa ońaltýǵa baramyz. Biraq, bul jer de jaman emes. Barlyǵy óte meiirimdi, jaýapty. Ulyma bulshyq etti qataitý men psihologiialyq jattyǵý unaidy. Qazir belsendi túrde ainalysady, - deidi Ianaikino aýylynyń turǵyny Gúlsezim Batyrǵalieva.
Inkliýziiany qoldaýdyń 16 kabinetin ashý - Elbasynyń taǵy bir bastamasy. Bul igi istiń BQO-daǵy aiaq alysymen Dariǵa Nazarbaeva tanysty.
Inkliýziiany qoldaý kabinetteri Oral qalasynyń №5 jalpy orta bilim beretin mektebinde jáne Terekti aýdany Podstepnoe aýylynyń №1 Podstepnoe orta mektebinde ornalasqan.
Inkliýziia kabinetterinde erekshe qajettiligi bar balalar synyptastarymen birge mektepte oqýǵa múmkindik alady, logopedterdiń, defektologtardyń jáne psihologtardyń únemi baqylaýynda bolady.
Dariǵa Nazarbaeva ońaltý ortalyǵy men inkliýziiany qoldaý kabinetterin aralai kele, «Qamqorlyq» bastamasyn iske asyrýdyń arqasynda jylyna 21 000 bala úshin ońaltý jáne kásibi qyzmet alýdyń múmkindigi týǵanyn atap ótti.
Ortalyqtardaǵy jáne inkliýziiany qoldaý kabinetterindegi jattyǵý balalardyń tolyqqandy azamat bolyp qalyptasýyna óz septigin tigizedi.
- Inkliýziiany qoldaý kabinetteriniń arqasynda ulym materialdy jaqsy qabyldai bastady. Logopod-defektolog úlken kómek kórsetti. Kádimgi synypta oqyp, inkliýzivti bilim berý kabinetine baramyz. Assistent qoldan kelgenshe kómegin aiamaidy, - deidi munda kelýshi balanyń anasy Sholpan Qapatova.
Sonymen qatar, sapar aiasynda Jáńgir han atyndaǵy agrarlyq-tehnikalyq ýniversitetiniń «Járdem-Vet» oqý-ǵylymi-óndiristik ortalyǵy janyndaǵy janýarlarǵa arnalǵan klinika, Oral qalasynyń jumyspen qamtý jáne áleýmettik baǵdarlamalar bóliminiń turmystyq zorlyq-zombylyq qurbandaryna arnalǵan daǵdarys ortalyǵy, zańgerlik kómek kórsetip, erekshe qajettilikteri bar adamdarǵa jumysqa ornalasýǵa kómektesetin, jeke daǵdylaryn damytý boiynsha treningter ótkizetin «Teń qoǵam» áleýmettik qoldaý ortalyǵyna da at basyn burdy.
