Shanhaida ótken Dúniejúzilik jasandy intellekt jónindegi konferentsiia aiasynda Prezident Qasym-Jomart Toqaev Kambodja Premer-ministri Hýn Manetpen kezdesti, dep habarlaidy ult.kz.
Memleket basshysy Qazaqstan Kambodjamen berik dostyqqa jáne ózara qurmetke negizdelgen seriktestikti joǵary baǵalaitynyn jetkizdi.
Qazaqstan Prezidenti eki el arasyndaǵy saýda-ekonomikalyq yntymaqtastyqqa tyń serpin berý úshin áleýet mol ekenin atap ótti.
Prezidenttiń pikirinshe, taýar ainalymyn arttyratyn perspektivti baǵyttar qataryna aýyl sharýashylyǵy, toqyma óndirisi, týrizm, qurylys, taǵam ónerkásibi, kólik-logistika salalary kiredi. Atap aitqanda, elimiz bidai, tyńaitqysh jáne basqa da agrarlyq ónimder tasymalyn ulǵaitýǵa ázir.
Budan bólek, BUU elektrondyq úkimetti damytý indeksindegi úzdik 24 eldiń sapyna enetin Qazaqstan ozyq tehnologiia salasyndaǵy tájiribesimen bólise alady.
Premer-ministr Hýn Manet Kambodjanyń Qazaqstanmen qarym-qatynasty nyǵaitýǵa múddeli ekenin rastady. Ol eki eldiń úkimetteri men isker toptary arasyndaǵy bailanystardy nyǵaitýdyń mańyzyna toqtalyp, birlesken jobalarǵa jan-jaqty qoldaý kórsetýge daiyn ekenin jetkizdi.
Áńgimelesý barysynda Prezident pen Premer-ministr jahandyq jáne aimaqtyq qurylymdar aiasyndaǵy yqpaldastyq jóninde pikir almasty.
Qasym-Jomart Toqaev AÓSShK qyzmetine qoldaý kórsetkeni úshin Kambodja tarapyna rizashylyq bildirdi. Sondai-aq Premer-ministrge Astananyń BUU janynan Halyqaralyq sý uiymyn qurý jónindegi bastama kótergenin aitty.
Kezdesý sońynda Hýn Manet Qazaqstan Prezidentin ózine qolaily ýaqytta Kambodjaǵa saparmen kelýge shaqyrdy.
