Foto: teatrdyń baspasóz qyzmeti
Qalibek Qýanyshbaev atyndaǵy Qazaq ulttyq mýzykalyq drama teatry kórermenderge qazaq ádebietiniń kórnekti týyndysy negizinde sahnalanǵan jańa qoiylymdy usyndy. Teatr sahnasynda Maǵjan Jumabaevtyń «Sholpannyń kúnási» shyǵarmasy boiynsha spektakldiń premerasy ótti, dep habarlaidy Ult.kz.
Qoiylymnyń ereksheligi – avtor mátini tolyq saqtalyp, birde-bir sózi ózgertilmegen. Rejisserlik traktovka arqyly shyǵarmaǵa jańa sahnalyq sheshimder berilgen.
Spektakl kameralyq formatta sahnalanyp, úsh keiipkerdiń – Sholpan, Sársenbai jáne Ázimbai arasyndaǵy kúrdeli qarym-qatynasty beineleidi. Mundai format keiipkerlerdiń ishki jan dúniesine, olardyń kúizelisi men jasyryn sezimderine tereń úńilýge múmkindik beredi.
Qoiylymda Sholpannyń taǵdyry ǵana emes, Sársenbaidyń ishki álemi de keńinen ashylady. Sahnalyq týyndyda adamdar arasyndaǵy jasyryn syr, aitylmaǵan shyndyq, adamnyń jan azaby, moraldyq tańdaý jáne ómirdiń máni siiaqty máńgilik taqyryptar kóteriledi. Spektakl kórermenge daiyn jaýap usynbai, árkimniń óz paiymyn jasaýyna múmkindik beredi.
Qoiylymnyń qoiýshy rejisseri – Qazaqstannyń eńbek sińirgen qairatkeri Gúlsina Mirǵalieva. Qoiýshy ári kostiým sýretshisi – «Eren eńbegi úshin» medaliniń iegeri Shynar Elembaeva. Plastika rejisseri – Asan Boronchiev, al horeograf – Karina Jirenbaeva.
Jańa qoiylym klassikalyq ádebi týyndyny zamanaýi sahnalyq sheshimder arqyly qaita zerdelep, kórermendi adam taǵdyry men moraldyq tańdaý týraly tereń oiǵa jeteleidi.
