Qalibek Qýanyshbaev atyndaǵy Qazaq ulttyq mýzykalyq drama teatry kórermen nazaryna Maǵjan Jumabaevtyń «Sholpannyń kúnási» shyǵarmasy boiynsha spektakl premerasyn usyndy. Bul týraly Ult.kz QR Mádeniet jáne aqparat ministrligine silteme jasap.
Qoiylymda avtordyń birde-bir sózi ózgertilmei, mátin tolyqtai saqtalǵan. Tek rejisserlik traktovka arqyly jańa sahnalyq sheshimder usynylǵan.
Spektaklde nebári úsh keiipker – Sholpan, Sársenbai jáne Ázimbai arasyndaǵy qarym-qatynas kórinis tabady. Kameralyq formattaǵy qoiylym keiipkerlerdiń ishki jan dúniesine, olardyń kúizelisi men jasyryn sezimderine, kúrdeli adami bailanystaryna tereń úńilýge múmkindik beredi. Rejisser Sholpan beinesimen qatar Sársenbaidyń da jan dúniesin tereńirek ashýǵa tyrysqan.
Jalpy, spektaklde adamdar arasyndaǵy jasyryn syr men aitylmaǵan shyndyq, jeke adamnyń jan azaby, moraldyq tańdaý jáne ómirdiń qundylyǵy siiaqty máńgilik taqyryptar kóteriledi. Qoiylym kórermenge daiyn úkim usynbai, kerisinshe árkimge óz paiymyn jasaýǵa múmkindik beredi.
Spektakldiń qoiýshy rejisseri – Qazaqstannyń eńbek sińirgen qairatkeri Gúlsina Mirǵalieva. Qoiýshy jáne kiim sýretshisi – «Eren eńbegi úshin» medaliniń iegeri Shynar Elembaeva. Plastika rejisseri – Asan Boronchiev. Horeograf – Karina Jirenbaeva.
