Foto: gov.kz
Almatyda qala turǵyndaryna tiisip, agressivti áreket kórsetken sheteldik jasóspirimder elden shyǵarylýy múmkin, dep habarlaidy Ult.kz.
Politsiianyń málimetinshe, tekserýge áleýmettik jelilerde taraǵan beinejazbalar negiz bolǵan. Kadrlarda bir top jasóspirimniń qoǵamdyq oryndarda turǵyndarǵa zat laqtyryp, ádepsiz qylyq kórsetkeni baiqalady.
Oqiǵaǵa bailanysty Medeý jáne Almaly aýdandarynyń politsiiasy tekserý júrgizip, kúdiktilerdi anyqtady. Belgili bolǵandai, olar – Tájikstan azamattary.
Jasóspirimder Kámeletke tolmaǵandardy beiimdeý ortalyǵyna ornalastyrylyp, olarmen profilaktikalyq jumys bastalǵan. Al olardyń zańdy ókilderi balalardy tárbieleý mindetin durys atqarmaǵany úshin ákimshilik jaýapkershilikke tartyldy.
Sonymen qatar, quqyq buzǵan jasóspirimderge qatysty Qazaqstannyń kóshi-qon zańnamasyna sáikes el aýmaǵynan shyǵarý sharalary qarastyrylyp jatyr.
Qazirgi ýaqytta árbir derek boiynsha tekserý jalǵasýda. Qorytyndysy boiynsha olardyń áreketine quqyqtyq baǵa beriledi.
