Foto: QR TSM
XIV qysqy Paralimpiada oiyndarynyń ashylý saltanaty Italiianyń Verona qalasynda ótti, dep habarlaidy Ult.kz.
Milan-Kortina-2026 qysqy Paralimpiada oiyndaryna 56 elden 600-den asa sportshy qatysady. Qysqy Paralimpiada oiyndarynda Qazaqstan ulttyq quramasy para shańǵy jarysy men para biatlon sport túrleri boiynsha el namysyn qorǵaidy. Atap aitsaq, para biatlon men para shańǵy jarysynan: Erbol Hamitov, Aleksandr Gerlits, Sergei Ýsoltsev jáne Iýrii Berezin, al para shańǵy jarysynan – Nýrlan Alimov, Vladislav Kobal jáne Anna Grachiova.
«Bul oiyndar – bizdiń quramamyz úshin óz sheberligin dáleldep, el namysyn abyroimen qorǵaýǵa berilgen taǵy bir mańyzdy múmkindik. Qazaqstan ulttyq quramasynyń árbir sportshysy osy dodaǵa uzaq ári kúrdeli daiyndyq arqyly keldi. Olar kún saiyn eńbek etip, óz múmkindikterin dáleldeýge tyrysty. Erteń sportshylarymyz úshin alǵashqy jarys kúni. Barsha qazaqstandyqtardy ulttyq quramamyzǵa jankúier bolýǵa shaqyramyn. Bizdiń sportshylarymyzǵa sáttilik, ádil jarys jáne jarqyn jeńister tileimin»,- dedi Týrizm jáne sport vitse-ministri Serik Jarasbaev.
Aita keteiik, Milan-Kortina-2026 XIV qysqy Paralimpiada oiyndary 6-15 naýryz aralyǵynda ótedi. Dúbirli dodada para shańǵy jarysy, para biatlon, arbadaǵy kerling, para snoýbord, taý shańǵysy jáne para hokkei sport túrleri boiynsha 79 medal jiyntyǵyn sarapqa salady.
Paralipiada oiyndarynda ulttyq qurama 7-shi naýryz kúni para biatlonnan 7,5 km qashyqtyqtaǵy sprinttik jarys boiynsha synǵa túsedi. Jarys jolynda Erbol Hamitov, Aleksandr Gerlits, Sergei Ýsoltsev jáne Iýrii Berezin óner kórsetedi.
Ulttyq qurama qatysatyn jarystyń tikelei efiri Qazsport telearnasynyń efirinde kórsetiledi.
