Islam Karimovty emdeýge Resei, Germaniia jáne Finliandiia elderiniń bilikti mamandary atsalysty. Bul týraly Ózbekstan Respýblikasynyń úkimet portalynda habarlandy, deidi Ult.kz tilshisi QazAqparatqa silteme jasap.
«I.A. Karimov 27 tamyz kúni tańerteńgi 09.00 shamasynda es-tússiz kúiinde Ózbekstan Respýblikasy Densaýlyq saqtaý ministrligi dárigerlik-sanitarlyq birlestiginiń Ortalyq klinikalyq aýrýhanasyna jetkizildi. Júrgizilgen zertteýler, sonyń ishinde miǵa jasalǵan KT naýqastyń mi qan ainalymy torly qabyq astyna qan quiylý (insýlt) saldarynan buzylǵanyn anyqtady. Qan qysymy synap baǵanasy boiynsha 250/120 boldy. Júrek soǵysy toqtap qaldy. 20 minýt ishinde jasalǵan reanimatsiialyq sharalar júrek soǵysyn qalpyna keltirýge múmkindik berdi. Osydan keiin naýqasta atoniialyq esten taný bolyp, mi baǵanynyń qyzmetine qysym túsirý tirkeldi. Sol sebepti ol jasandy jolmen tynys berý qurylǵysyna aýystyryldy», - delingen habarlamada.
Tamyzdyń 27-inen 28-ine qaraǵan túni naýqas shet elderdiń bilikti neirohirýrg, kardiolog jáne reanimatologtarymen konsýltatsiialandy. Olar: akademik L.A.Bokeriia - A.N.Bakýlev atyndaǵy júrek-qan tamyry hirýrgiiasy ǵylymi ortalyǵynyń direktory (Resei); akademik A.A.Potapov - N.N.Býrdenko atyndaǵy neirohirýrgiia ǵylymi ortalyǵynyń direktory (Resei); professor Amir Sami (A.Samii) - Gannover internatsionaldyq neirohirýrgiia institýtynyń vitse-prezidenti jáne atqarýshy direktory (Germaniia), professor Djilli Dreifýs (G.Dreyvus) - Kardiotorakaldyq ortalyqtyń direktory (Monako), professor Hiýgo Katýs (H.Katus) - Heidelbergtiń ýniversitet janyndaǵy klinikanyń kardiologiia bóliminiń basshysy (Germaniia), professor Iýka Hernisniemi (Y.Hernesniemi) - Helsinki ýniversitetiniń Ortalyq aýrýhanasynyń neirohirýgiia bóliminiń professory (Finliandiia).
2016 jyldyń 2 qyrkúiegi kúni jasalǵan sharalarǵa qaramastan 20:15-te júrek qyzmeti toqtady. Qarqyndy reanimatsiialyq sharalar nátije bermedi jáne 20:55-te naýqastyń biologiialyq ólimi tirkeldi».
Eske sala keteiik, Islam Karimovtyń janazasy 3 qyrkúiek kúni Samarqanda shyǵarylady.
