"Ózbekstannyń memlekettik telearnasy prezident Islam Kárimovtiń 2 qyrkúiek kúni saǵat 20.15-te Tashkentte qaitys bolǵanyn habarlady. Solaisha onyń densaýlyǵyna qatysty bir aptaǵa jýyq sozylǵan alyp-qashpa áńgimelerge toqtaý salatyn resmi málimdeme jariialandy", - dep habarlaidy "Ult aqparat".
Islam Kárimov 3 qyrkúiek kúni týǵan qalasy Samarqanda jerlenbek. Memlekettik jerleý komissiiasyn premer-ministr Shavkat Mirziiaev basqarady.
Ózbekstan Respýblikasynyń tuńǵysh Prezidenti, memleket qairatkeri, Ózbekstan ǵylym akademiiasynyń akademigi, Ózbekstan Qaharmany 1938 jyldyń 30 qańtarynda Samarqanda dúniege kelgen.
Keńes kezinde Ózbekstan Kompartiiasy OK-niń birinshi hatshysy bolǵan. Al 1990 jyldyń 24 naýryzynda Ózbekstan Uly Keńesiniń sessiiasynda Ózbekstan Prezidenti bolyp sailanyp, konstitýtsiiaǵa sáikes Ministr Kabineti (Ýázirler makkamasy) tóraǵasy qyzmetin qosa atqardy. Eldi 1991 jyldan bastap, iaǵni táýelsizdik alǵan sátten basqaryp keldi.
Eske salaiyq, 2 qyrkúiekte Ózbekstan úkimeti el prezidenti Islam Kárimovtiń aýyr jaǵdaida jatqanyn málimdegen bolatyn.
Ult portaly
