Petropavl turǵynyn internet arqyly 800 myń teńgege aldady degen kúdikpen 23 jastaǵy almatylyq ustaldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, biyl sáýir aiynda Petropavl turǵyny politsiiaǵa aryzdanyp, óziniń internet-alaiaqqa aldanǵanyn aitqan.
Ol Instagram áleýmettik jelisindegi pablikterdiń birinde habarlandyrýdy kórip, kóterme baǵamen balalar kiimin almaqshy bolady.
Áiel «satýshyǵa» 800 myńnan astam teńge aýdarady, keiin alaiaq bailanysqa shyqpai qoiady.
Atalǵan fakti Sotqa deiingi tergep-tekserýdiń biryńǵai tizilimine QR Qylmystyq kodeksiniń «Alaiaqtyq» baby boiynsha engizildi.
Jedel-izdestirý is-sharalary nátijesinde tártip saqshylary qylmysqa Almaty oblysynyń 23 jastaǵy turǵynynyń qatysy baryn anyqtady.
Politseiler kúdiktini qyzmettik issapar barysynda ustady. Endi onyń basqa qylmystarǵa qatysy bar-joǵyn anyqtaý úshin materialdar Almatyǵa jiberilmek.
«Adamdar internet arqyly zattardy satý jáne satyp alýda saq bola bastaǵanymen, aldyn ala tólem talap etýmen bailanysty alaiaqtyq áli kúnge deiin kezdesedi. Jelide usynylatyn taýar men qyzmetterdi tekserý, qosymsha foto, beine materialdardy talap etý qajettigin eskertemiz», - deidi Petropavl qalalyq PB kriminaldyq politsiia bóliminiń bastyǵy Darhan Ziiafiddin.
Politseilerdiń aitýynsha, keń taralǵan alaiaqtyqtyń biri – «banktiń qaýipsizdik qyzmetinen» qońyraý shalý.
Adamdardy usynylǵan shotqa aqsha jiberýge nemese qupiiasózderdi, bank kartasynyń syrt jaǵyndaǵy cvv-kodtaryn, esepshotqa qol jetkizýge múmkindik beretin basqa da qupiia aqparatty jiberýge kóndiredi.
«Taǵy bir tásil – qashyqtyqtan qol jetkizý qosymshasyn telefonǵa ornatý týraly usynys jasaý, bul qosymsha arqyly qylmyskerler uialy telefonǵa, sáikesinshe, barlyq shottarǵa qol jetkize alady. Bóten adamdardyń nusqaýymen belgisiz baǵdarlamalardy júktemeýge jáne paidalanbaýǵa shaqyramyz. Sondai-aq, kartanyń nómiri men cvv kod siiaqty qupiia málimetterdi talap etetin kúmándi siltemeler boiynsha ótpegen jón». , - deidi Darhan Ziiafiddin.
