Foto: Polisia.kz
Ishki ister ministrligi azamattardyń smartfondaryna ziiandy qosymshalardy ornatý arqyly qashyqtan qol jetkizetin alaiaqtyq shema týraly eskertti, dep habarlaidy Ult.kz.
Qazirgi ýaqytta Android operatsiialyq júiesi ornatylǵan mobildi qurylǵylarǵa ziiandy baǵdarlamany ornatyp, taratý jaǵdailary tirkelýde. Qaskóiler ony taratý úshin túrli tásilder qoldanady.
Mysaly:
- - messendjerler men áleýmettik jeliler arqyly fishingtik siltemelerdi taratý;
- - jalǵan mobildi qosymshalar;
- - foto, beine jáne qujattar túrinde jasyrylǵan ziiandy qosymshalar;
- - memlekettik organdar, bankter jáne jetkizý qyzmetteri atynan jiberiletin habarlamalar;
- - aktsiiaǵa nemese utys oiynyna qatysý syltaýymen qosymsha ornatýdy talap etetin qońyraýlar.
Mundai baǵdarlama ornatylǵannan keiin alaiaqtar qurylǵyǵa qashyqtan qol jetkizý múmkindigine ie bolady. Bul shottardaǵy qarajattyń urlanýyna, onlain-nesielerdiń rásimdelýine, jeke derekter men hat almasýdyń taralýyna, sondai-aq telefondy buǵattap, tólem talap etýge ákep soǵýy múmkin.
Ózińizdi qorǵaý úshin úshinshi tulǵalardyń ótinishi boiynsha qosymshalardy ornatpańyz, SMS arqyly kelgen kodtardy eshkimge habarlamańyz, kúmándi siltemelerge ótpeńiz, tek resmi qosymshalardy jáne antivirýstyq baǵdarlamany paidalanyńyz, bank operatsiialary týraly habarlamalardy qosyńyz.
Telefonyńyzda qaýipti baǵdarlamanyń bolý belgileri: batareianyń tez taýsylýy, qurylǵynyń qyzyp ketýi jáne beitanys qosymshalardyń paida bolýy.
- Kúdik týyndaǵan jaǵdaida internetti dereý óshirińiz, bankpen bailanysyńyz jáne quqyq qorǵaý organdaryna júginińiz. Saq bolyńyz. Tsifrlyq qaýipsizdik ózimizden bastalady, - dedi IIM.
