Foto: ashyq derekkóz
Ishki ister ministrligi 15 naýryzda ótetin referendým qarsańynda qazaqstandyqtarǵa úndeý jasap, jalǵan aqparat taratpaýǵa shaqyrdy, dep habarlaidy Ult.kz.
Ministrlik ókilderiniń aitýynsha, mundai mańyzdy saiasi kezeńderde áleýmettik jeliler men messendjerlerde jalǵan aqparat pen arandatýshylyq sipattaǵy habarlamalar jii taralady. Olardyń negizgi maqsaty – qoǵamdy adastyrý jáne eldegi jaǵdaidy turaqsyzdandyrý.
Jalǵan aqparat úshin jaýapkershilik bar
Qazaqstan Respýblikasynyń Ishki ister ministrligi qazirgi kezde tsifrlyq tehnologiialar men jasandy intellektiniń damýyna bailanysty jalǵan kontent jasaý burynǵydan áldeqaida ońai bolǵanyn atap ótti. Sonyń saldarynan qysqa ýaqyt ishinde shyndyqqa uqsas, biraq adamdardy jańylystyratyn materialdar taralýy múmkin.
Ministrlik mundai áreketter zań buzýshylyq ekenin eske saldy. Kórineý jalǵan aqparat taratqan tulǵalarǵa ákimshilik nemese qylmystyq jaýapkershilik qarastyrylǵan.
Azamattarǵa úndeý
IIM azamattardy zań talaptaryn saqtaýǵa jáne tekserilmegen aqparatty taratpaýǵa shaqyrdy. Kúmándi habarlamalardy kórgen jaǵdaida olardy ári qarai jibermeý qajettigi aityldy, óitkeni jalǵan aqparat kóbine dál osyndai jolmen taralady.
Ministrlik ókilderi referendým kezinde qoǵamdyq tártip pen qaýipsizdik tolyq qamtamasyz etiletinin málimdedi.
«Jalǵan aqparat taratý jáne arandatýshylyq áreketter jedel anyqtalyp, zań aiasynda qatań qaralady. Sondyqtan tek resmi jáne senimdi aqparat kózderine ǵana sený qajet», – dedi Shyńǵys Alekeshev.
