IIM mopedterdi 5 sáýirge deiin tirkep úlgerýge shaqyrdy

Foto: Kolesa.kz

Ishki ister ministrligi mopedterdi tirkep úlgerýge eki aptadai ǵana ýaqyt qalǵanyn eskertti. Zań boiynsha 5 sáýirden keiin tirkelmegen mopedti basqarýǵa tyiym salynady, dep habarlaidy Ult.kz.

Qazirgi ýaqytta respýblika boiynsha 8527 moped tirkeldi. Quqyq buzýshylyq anyqtalǵan jaǵdaida Ákimshilik kodekstiń 590-babynyń 2-bóligine sáikes jaýapkershilik kózdeledi.

Mopedti tirkeý úshin turǵylyqty jeri boiynsha arnaiy halyqqa qyzmet kórsetý ortalyǵyna júginý qajet. Ózińizben birge kelesi qujattardy alý kerek: jeke basty kýálandyratyn qujat, elektrondy túri de jaraidy, tehnikalyq qujat nemese mopedtiń tehnikalyq sipattamalary týraly málimetter. Ótinishti toltyryp, mopedti tekserýden ótkizip, kólik quralyn tirkeý, tirkeý týraly kýálik jáne memlekettik nómir alý úshin memlekettik bajdardy tóleý qajet.

"Tirkeýdi keiinge qaldyrmańyzdar! Ózińiz úshin "jaǵymsyz saldardan" aýlaq bolý úshin mopedti zań talaptaryna sáikes keltirgenińiz abzal", - dedi departament bastyǵy - IIM resmi ókili Shyńǵys Alekeshev.