Foto: Polisia.kz
Qazaqstanda alaiaqtyqtyń jańa tásili keńinen taralyp jatyr. Qaskúnemder ózderin iri kompaniialardyń, memlekettik organdardyń nemese joǵary oqý oryndarynyń basshylary retinde tanystyryp, azamattardy aldaýǵa kóshken, dep habarlaidy Ult.kz.
IIM málimetinshe, alaiaqtar jalǵan akkaýnttar men telefon nómirlerin paidalanyp, qyzmetkerlerge qońyraý shalady nemese messendjerler arqyly habarlasady. Olar derekterdiń taralýy nemese qarjynyń urlaný qaýpin syltaýratyp, jaǵdaidy ádeii ýshyqtyryp kórsetedi. Sonymen qatar jedel áreket etýdi talap etip, psihologiialyq qysym jasaidy.
Osydan keiin azamattarǵa “mamandar” nemese “quqyq qorǵaý organdarynyń qyzmetkerleri” habarlasatyny aitylyp, olardyń nusqaýlaryn qatań oryndaý talap etiledi. Nátijesinde adamdardy aqshasyn sheship alyp, ony “qaýipsiz shottarǵa” aýdarýǵa kóndiredi. Qarajat qolǵa túsken soń, alaiaqtar birden bailanysqa shyqpai qalady.
Qaskúnemder zamanaýi tehnologiialardy da belsendi qoldanady. Atap aitqanda, nómirdi aýystyrý, daýysty ózgertý siiaqty tásilder arqyly azamattardyń senimine kirip, qyraǵylyǵyn tómendetýge tyrysady.
IIM eskertedi: bankter men memlekettik organdardyń qyzmetkerleri eshqashan telefon arqyly aqsha aýdarýdy talap etpeidi. Azamattarǵa beitanys adamdardyń nusqaýlaryn oryndamaý, barlyq aqparatty tek resmi derekkózder arqyly tekserý jáne kúmándi jaǵdai týyndasa, birden quqyq qorǵaý organdaryna júginý usynylady.
