Foto: ashyq derekkóz
QR Táýelsizdik kúnine orai Google jasandy intellektiniń Gemini modelin qazaq tilinde iske qosqanyn jariialady, dep habarlaidy Ult.kz.
Bul - eń ozyq sanalatyn JI-modeliniń tildik qoldaýyn keńeitýge baǵyttalǵan jahandyq bastamanyń bir bóligi. Qazaq tili Gemini 3 býynyn iske qosý aiasynda qosylǵan 23 jańa tildiń qataryna endi. Bul Qazaqstandaǵy paidalanýshylarǵa Gemini múmkindikterin álemdegi eń iri tildermen teń dárejede, óz ana tilinde qoldanýǵa múmkindik beredi.
Gemini-diń qazaq tilindegi interfeisi qazirdiń ózinde veb-nusqada qoljetimdi. Ol úshin paidalanýshylar Google akkaýntynyń baptaýlarynda qazaq tilin tańdaýy qajet. Aldaǵy ýaqytta Android jáne iOS júielerine arnalǵan nusqalardy qoldaý, sondai-aq Gemini Live servisin iske qosý josparlanyp otyr.
Gemini-diń qazaq tilindegi nusqasynyń iske qosylýy Google kompaniiasynyń Qazaqstanda jasandy intellektini damytýǵa baǵyttalǵan keń aýqymdy jumysynyń bir bóligi. Bul jumys kadrlardy daiarlaýǵa investitsiia salýdy, tsifrlyq daǵdylardy damytýdy jáne ázirleýshilerdi qoldaýdy qamtidy. Kompaniianyń baǵalaýynsha, jasandy intellektini memlekettik sektorǵa engizý ekonomikalyq jaǵynan da tiimdi. Sebebi ol memlekettik basqarý ónimdiliginiń artýy jáne biýdjet júiesinde turaqtylyqtyń kúsheiýine septigin tigizedi, ári eldiń ekonomikalyq ósimine qosymsha úles qosady.
QR Jasandy intellekt jáne tsifrlyq damý ministrliginde jahandyq JI sheshimderiniń qazaq tilinde qoljetimdi bolýy tsifrlyq memleketti damytý, azamattar úshin tehnologiialardyń qoljetimdiligin arttyrý jáne básekege qabiletti AI-ekojúie qalyptastyrý jolyndaǵy mańyzdy qadam ekenin atap ótti.
Ministrlik jasandy intellektini damytý, tsifrlyq ónimderdi lokalizatsiialaý jáne jańa býyn mamandaryn daiarlaý baǵytynda halyqaralyq tehnologiialyq seriktestermen yntymaqtastyqty odan ári jalǵastyrady.
