Fýtboldan Premer-liga komandalary arasyndaǵy Qazaqstan chempionaty 3 tamyzda qaita jalǵasady, dep habarlaidy "Ult aqparat" Qazaqstan fýtbol federatsiiasyna silteme jasap.
Esterińizge sala ketelik, dop dodasy 8 naýryzda bastalǵan bolatyn. Eki týrdan keiin elimizde koronavirýs pandemiiasynyń órshýine bailanysty ol keiinge shegerildi . Al 1 shildede úshinshi týr oiyndary ótti. Odan keiin elimizde karantindik sharalardyń kúsheiýine bailanysty dop dodasy taǵy da keiinge shegerildi.
Endigi kezekte Qazaqstan chempionatyn ońtústik astana - Almaty qalasynda ótkizý josparlanyp otyr. Oiyndar Almaty jáne oǵan irgeles ornalasqan Talǵar qalalarynda ótkiziledi.
Osyǵan bailanysty Qazaqstan fýtbol federatsiiasynyń bas hatshysy Azamat Aitqojin otandyq klýbtarǵa úndeý joldady. Onda dop dodasyn jalǵastyrýdyń múmkindigi jaiynda aitylǵan.
«Oiyndar Almaty men Talǵar qalalarynda ótedi. Bul chempionatty jalǵastyrý baǵytyndaǵy eń qolaily sheshim ekenin aita ketý kerek. Endigi kezekte otandyq klýbtar úshin qatynaý, fýtbolshylardy oiynnan keiin qalpyna keltirý boiynsha qolaily jaǵdai jasalady. Oǵan qosa komandalar ýaqyt pen qarjyny únemdeidi. Jeke avtobýsty paidalaný, bir bazada turý jáne ózge adamdarmen qarym-qatynasty azaitý jaǵy eskeriledi. Karantin sharttaryn saqtaý - epidemiologiialyq qaýipsizdik turǵysynan durys sheshim», - dedi Azamat Aitqojin klýb basshylarymen ótken beinekonferentsiiada.
Barlyq komandalardyń memlekettik organdarmen kelisilgen sanitarlyq protokoldyń barlyq sharttaryn oryndaýy basty nazarǵa alynady. Fýtbolshylar oiynnan buryn PTR test tapsyrady. Olardyń densaýlyǵyn baqylaý árbir klýbtyń meditsina qyzmetkerlerine júkteledi.
Aita keterligi, mundai jaǵdai otandyq fýtbol tarihynda alǵash ret kezdesip otyr. Qazaqstan chempionaty tuńǵysh márte bir qalada ótedi. Chempionattyń barlyq oiyny respýblikalyq «Qazsport» telearnacynan tikelei efirde kórsetiledi.
