8 maýsymda Frantsiia prezidenti Emmanýel Makrondy jaǵynan tartyp jibergen frantsýz azamaty Damian Tarel 18 aiǵa erkinen ajyratyldy. Ol túrmede tórt ai otyrady, qalǵan jaza merzimin shartty túrde óteidi.
Bul oqiǵa 8 maýsymda Frantsýz prezidenti Emmanýel Makron eldiń ońtústigine barǵan kezde bolǵan.
Áleýmettik jelilerde jariialanǵan videoda Makron halyqpen amandasyp jatqan kezde, arasynan bir adam prezidentke jaqyndap, "Makroniia joǵalsyn!" dep aiqailap, jaǵynan salyp jibergen.
Ol sot otyrysy kezinde istegen isine ókinbeitinin aitqan. Sottalýshy Makron el jaǵdaiyn tómendetip jiberdi degen. Damian Tarel úkimetke qarsy "sary jiletterdi" qoldaitynyn bildirgen.
Al Makron bul oqiǵaǵa onsha mán bermegenin, sailaýshylarmen kezdesýdi jalǵastyra beretinin jetkizgen. Osyǵan deiin ol "demokratiiada jekkórýshilik pen zorlyq-zombylyqqa oryn joq ekenin" aitqan.
