Tanymal Telegram arnalardyń birinde COVID-19 qarsy vaktsinatsiia álemde pandemiiany órshitip jibergeni týraly aqparat tarady. Britandyq taldaýshy Djoel Smolli Djon Hopkins ýniversitetiniń statistikasyna súiene otyryp, osyndai qorytyndy jasaǵan. Mundai málimdemeler nege durys emes ekenin túsindireiik, dep jazady Stopfake.kz saity.
Djoel Smollidiń tujyrymdary týraly álemge internettegi senimsiz BAQ-tyń biri sanalatyn NewsTarget jariia etti. Portalda psevdoǵylymi jańalyqtar men konspirologiialyq teoriialar shyǵady, sondai-aq ýltra ońshyl kózqarastaǵy pikirler aitylady.
Maqalanyń ózi Smollidiń Twitter-degi paraqshasynda jariialanǵan qorytyndylaryna negizdelgen. Bul rette ol derekterdi óte qarapaiym túsindiredi, al onyń qorytyndylary boljamdarǵa uqsas.
Aita keteiik, Djons Hopkins ýniversitetiniń resmi saitynda vaktsinatsiia pandemiiany órshitip jibergeni týraly aqparat joq. Kerisinshe, ýniversitet mamandary vaktsinalardy tiimdi jáne qaýipsiz dep ataidy jáne aýrý juqtyrýdyń aýyr saldaryn boldyrmas úshin egilýdi usynady.
COVID-19 syrqattanýshylyq pen ólim-jitim týraly álemdik statistika Smollidiń teoriialaryna qaishy keledi. BUU biyl 6 qazanda jariialanǵan málimetter boiynsha, álemde KVI juqtyrý men odan bolatyn ólim sany azaiyp keledi.
«27 qyrkúiekten 3 qazanǵa deiin bir apta ishinde Eýropadan basqa barlyq aimaqtar jańa aýrý juqtyrý jaǵdailarynyń tómendegenin habarlady, al Eýropadaǵy kórsetkish aldyńǵy aptadaǵydai boldy. Aýrý juqtyrýdyń apta saiynǵy kórsetkishteriniń eń kóp tómendeýi Afrikada (43%), Shyǵys Jerorta teńizi (21 %), Ońtústik-Shyǵys Aziia (19%), Amerika (12%) jáne Batys tynyq muhity (12%) aimaqtarynda tirkeldi», – delingen uiymnyń saitynda.
Álem boiynsha COVID-19 juqtyrý jaǵdailarynyń tómendeýi Djon Hopkins ýniversitetiniń resmi saityndaǵy syrqattanýshylyq kestelerinde de kórsetiledi.
Demek, vaktsinatsiia pandemiiany órshitip jiberi degen qaýesetke senýdiń qajeti joq. Birinshiden, aqparat kózi óte senimsiz, ekinshiden, BUU men Djons Hopkins ýniversitetiniń resmi málimetteri álem boiynsha COVID–19 syrqattanýshylyq pen odan bolatyn ólim-jitim deńgeiiniń tómendegenin dáleldedi.
