Facebook áleýmettik jelisinde Messenger Rooms toptyq beineqońyraýlar servisi beisenbide, 14 mamyrda, AQSh pen Kanadada resmi túrde iske qosyldy. Kompaniia basshysy Mark Tsýkerberg óziniń áleýmettik jelidegi paraqshasynda búkil álem boiynsha qosymshanyń iske qosylýy kelesi aptaǵa belgilengenin málim etti, dep habarlaidy "Ult aqparat".
Bul servis koronavirýs pandemiiasyna bailanysty beineqońyraýlarǵa suranystyń artýyna jaýap retinde quryldy. Mundai konferentsiialardy Facebook nemese Messenger qosymshalary arqyly jasaýǵa bolady.
«Siz jeke «bólme» (Room) jasai alasyz jáne silteme arqyly birneshe dosyńyzdy shaqyra alasyz nemese óz tobyńyzdyń bireýine siz josparlap otyrǵan sharaǵa arnalǵan «bólme» jasai alasyz. Budan bólek, barlyq dostaryńyz úshin jańalyq taspasynyń joǵarǵy jaǵynda bólme jasap, kimniń kirgenin kóre alasyz», - dep jazdy Tsýkerberg.
Messenger Rooms servisinde ýaqytqa shekteý joq, «bólmege» 50 adamǵa deiin tirkeýge bolady. Jaqyn arada toptyq qońyraýlar Tsýkerberg kompaniiasyna tiesili «WhatsApp» jáne «Instagram» áleýmettik jelilerinde de qoljetimdi bolady.
