Pavlodardyń «Ertis» klýby fýtboldan Qazaqstan chempionatyna qatysýdan bas tartty, dep habarlaidy "Ult aqparat" Qazaqstan kásipqoi fýtbol ligasyna silteme jasap.
Kásipqoi fýtbol ligasy atyna atalǵan komandadan ótinish túsken. Ótinishte fýtbol klýbynyń qamqorshylyq keńesiniń jalpy jinalysynda klýb tarapynan qarjy jáne sporttyq mindettemelerdi oryndai almaityndyǵy jóninde sheshim qabyldanǵany jóninde aitylǵan. Osyǵan bailanysty komanda 2020 jylǵy Qazaqstan chempionatyna qatysýǵa bas tartqan.
«Qabyldanǵan ótinishke bailanysty «Ertis» fýtbol klýby chempionatqa qatysýshylar tiziminen shyǵarylady. Fýtboldan Qazaqstan chempionatyny reglamentiniń 4.18 pýnktine sáikes eger de chempionattan shyǵarylǵan klýb chempionat barysynda 22 oiynnan kem kezdesý ótkizse (1-shi jáne 2-shi ainalymdy aiaqtamasa), onyń barlyq nátijesi joiylady. Sonymen qatar «Ertis» klýbynyń bas komandasy Qazaqstan chempionatyna qatysýǵa bas tartqany úshin klýbtyń jastar komandasy ekinshi liga komandalary arasyndaǵy birinshilikke qatysa almaidy. «Ertis» fýtbol klýbynyń barlyq oiyndary Chempionattyń jańartylǵan kúntizbesinen alynyp tastalady», - dep málim etti Qazaqstan kásipqoi fýtbol ligasy.
Esterińizge sala ketelik, komanda 1965 jyly qurylǵan. Qazaqstan chempionatynda 1993, 1997, 1999, 2002, 2003 jyldarda chempion atansa, 1994, 1996, 2004, 2012 jyldarda kúmis júldeger boldy. Al 1992, 1998, 2000, 2008, 2010, 2016 jyldarda qola júldege qol sozdy.
«Ertis» biylǵy chempionatta eki oiyn ótkizdi. Aldymen Qyzylordada jergilikti «Qaisardan» 0:1 esebimen jeńilse, odan keiin óz alańynda Petropavldiń «Qyzyljar» klýbymen 1:1 esebimen teń tústi. Týrnir kestesinde 1 upaimen toǵyzynshy orynda turǵan bolatyn.
