Elimizde azamattyq qorǵaý organdarynyń qulaqtandyrý júiesi tekseriledi, dep habarlaidy QazAqparat.
21 jeltoqsanda saǵat 9.00-den 12.00-ge deiin azamattyq qorǵaýdyń qulaqtandyrý júiesine respýblikalyq tekserý júrgizý josparlanǵan.
Tótenshe jaǵdailar týraly halyqty qulaqtandyrý jáne habardar etý - turǵyndardy tabiǵi qubylystardyń ártúrli faktorlarynyń áserinen bolatyn apattyń nemese joiqyn áserdiń teris saldarynan qorǵaýǵa múmkindik beretin negizgi qaýipsizdik sharasy.
Qulaqtandyrý júiesin tekserý barysynda elektr dabyldaryn jáne sirenalyq-sóileý qurylǵylaryn (daýys zoraitqyshtardy) qysqa merzimge qosý, sondai-aq teledidar jáne radioarnalarynyń efiri arqyly habarlaý, internet-resýrstary men mobildi qosymshalarda aqparatty ornalastyrý josparlanǵan.
«Barshanyń nazaryna!!!» dybystyq signaly - qaýip tóngen nemese tótenshe jaǵdai týyndaǵan kezde barlyq shuǵyl habarlamalardy berýdiń aldynda halyqtyń nazaryn aýdarý úshin beriletin eskertý dabyly.
Dybystyq signaldy estigen kezde teledidarlar men radioqabyldaǵyshtardy qosý kerek.
Internet resýrstardaǵy jáne mobildi qosymshalardaǵy aqparattardy apat týyndaǵan jaǵdaida odan ári áreket etý týraly nusqaýlar alý úshin oqyp shyǵý kerek.
Sonymen qatar, qaýipti óndiristik obektiler men gidrotehnikalyq qurylystardaǵy jergilikti qulaqtandyrý júieleriniń jaramdylyǵy tekseriledi.
Qulaqtandyrý júiesine respýblikalyq tekserý júrgizý qulaqtandyrý jabdyǵyn ázirlikte ustaýǵa jáne halyqty yqtimal tótenshe jaǵdailardan qorǵaýǵa baǵyttalǵan.
