Foto: Pexels.com
Memleket basshysynyń tapsyrmasyn iske asyrý jáne inkliýzivti, arnaiy bilim berýdi júieli damytý maqsatynda QR Oqý-aǵartý ministrligi «Erekshe bilim berý qajettilikteri bar balalardy arnaiy psihologiialyq-pedagogikalyq qoldaý standartyn bekitý týraly» buiryq jobasyn ázirledi, dep habarlaidy Ult.kz.
Qujat arnaiy bilim berýdiń sharttaryna, sapasy men mazmunyna qoiylatyn biryńǵai eń tómengi talaptardy aiqyndaidy, sondai-aq osyndai qoldaý kórsetýge jaýapty uiymdar men mamandardyń qyzmetin retteidi. Memlekettik deńgeide alǵash ret bilim berýdiń barlyq satylarynda erekshe bilim berý qajettilikteri bar balalardy súiemeldeýge júieli tásil bekitiledi.
«Buiryq jobasy balalardyń barlyq sanattary úshin sapaly bilimge teń qoljetimdilikti qamtamasyz etý jolyndaǵy mańyzdy qadam bolmaq. Qazir sondai-aq «Erekshe bilim berý qajettilikteri bar balalardy keshendi qoldaý týraly» QR Zańy ázirlenýde, ol balalar men otbasylaryn vedomstvoaralyq súiemeldeýdiń institýtsionaldyq jáne quqyqtyq tetikterin qamtityn bolady», - dep atap ótti inkliýzivti jáne arnaiy bilim departamentiniń direktory Laýra Býtabaeva.
Esterińizge sala keteiik, ótken jyly ministrlik inkliýzivti jáne arnaiy bilim berý salasyndaǵy normativtik bazaǵa keshendi taldaý júrgizdi. Onyń qorytyndysy boiynsha 15 Normativtik-quqyqtyq akt bekitilip, nátijesinde, balalarǵa týǵannan bastap mamandyq alǵanǵa deiingi psihologiialyq-pedagogikalyq súiemeldeýdiń úsh deńgeili modeli engizildi. Qoldaý kabinetterine jańa talaptar belgilendi, erekshe bilim berý qajettilikteri bar balalarmen jumys isteýdiń jeke baǵdarlamalary ázirlendi, pedagog-assistent, arnaiy pedagog jáne jeke kómekshi siiaqty jańa laýazymdar engizildi.
2024 jyldyń derekteri boiynsha Qazaqstanda erekshe bilim berý qajettilikteri bar balalardyń sany 230 myńnan asty.
