Foto: QR TSM
Qazaqstan Respýblikasy Týrizm jáne sport ministri Erbol Myrzabosynov para biatlonnan Milanda ótken qysqy Paralimpiada chempiony Erbol Hamitovpen jáne jattyqtyrýshylarymen kezdesti, dep habarlaidy Ult.kz.
Kezdesý barysynda ministr otandyq sporttyń damýyna qosqan eleýli úlesi men halyqaralyq arenalardaǵy joǵary jetistikteri úshin Erbol Hamitovqa «Eńbek sińirgen sport sheberi» ataǵyn tabystady.
Erbol Hamitov – Qazaqstannyń para sporttaǵy álemdik deńgeidegi jetekshi sportshylarynyń biri. Onyń basty ereksheligi – ámbebaptyǵy. Ol para shańǵy jarysy men para biatlonda birdei joǵary nátijeler kórsetip, tózimdilik, dáldik jáne taktikalyq sheberlikti sheber ushtastyra biledi. Sonymen qatar ol para biatlonnan Álem kýboginiń jalpy esebinde jeńiske jetip, Hrýstal globýsty ielengen Qazaqstan tarihyndaǵy alǵashqy sportshy atandy.
Sondai-aq ol jýyrda Italiianyń Milan-Kortina qalalarynda ótken XIV qysqy Paralimpiadada Erbol Hamitov el qorjynyna para biatlonnan altyn, para shańǵy jarysynan qola medal saldy.
Budan bólek, ministr Erbol Hamitovtyń jattyqtyrýshylary – Aslan Toqbaev, Vasilii Kolomiets jáne Anton Jdanovichti Qurmet gramotasymen marapattady.
Buǵan deiin Memleket basshysy Erbol Hamitovqa III dárejeli «Barys» ordenin tabystaǵan bolatyn. Al Vasilii Kolomiets pen Anton Jdanovich «Parasat» ordenimen, Aslan Toqbaev «Qurmet» ordenimen marapattaldy.
Kezdesý barysynda Erbol Myrzabosynov myqty sportshylar men kásibi sport menedjerlerin qoldaýdyń mańyzyn erekshe atap ótti. Óitkeni olardyń jetistikteri Qazaqstannyń halyqaralyq deńgeidegi bedelin arttyrýǵa zor úles qosady.
Aita keteiik, búginde elimizde para sporttyń 19 túri qarqyndy damyp keledi. 2025 jyldyń qorytyndysy boiynsha 66 159 múmkindigi shekteýli azamat júieli túrde dene shynyqtyrý jáne sportpen ainalysady. Qazirgi tańda respýblikada múmkindigi shekteýli jandarǵa arnalǵan Respýblikalyq sporttyq daiarlaý ortalyǵy, 16 sport klýby, Almaty oblysynda sportty damytý direktsiiasy jáne 2 arnaiy sport mektebi jumys isteidi.
