QR Bilim jáne ǵylym ministrligi epidemiialyq ahýal jaqsarǵan jaǵdaida dástúrli oqytý formatyna kezeń-kezeńimen kóshedi. Bul týraly QR Bilim jáne ǵylym vitse-ministri Sholpan Qarinova aityp berdi, dep habarlaidy QazAqparat.
«Eń aldymen, bul jaǵdaida balalar men pedagogtardyń, jalpy halyqtyń densaýlyǵyn eskerýimiz qajet. Bilim berý salasyndaǵy quzyrly organ retinde ministrliktiń sapaly bilim men balalardyń densaýlyǵy arasynda teńgerim tabýy qajettigin, oǵan jaýapty ekendigimizdi túsinemiz. Sanitarlyq-epidemiialyq ahýalǵa qarai ár aimaqta oqytý formatyn aýystyrý boiynsha sheshim qabyldanady. Iaǵni, jalpy respýblika boiynsha ortaq bir sheshim qabyldanbaidy. Barlyǵy sanitarlyq-epidemiialyq ahýalǵa bailanysty bolady», - dedi vitse-ministr «Atameken» UKP ótkizgen onlain jinalysta.
Onyń aitýynsha, ministrlik dástúrli oqytý formatyna kezeń-kezeńimen kóshý boiynsha jospar ázirlep qoiǵan.
«Eger sanitarlyq jaǵdai jaqsarsa, eń aldymen 1-5 synyptar oqý protsesine kirisedi. Bul ýaqytta 6-11 synyptar qashyqtan oqytylady. Jaǵdai taǵy jaqsara tússe, 6-11 synyptar da shtattyq rejimge kóshiriledi. Mektepterde sanitarlyq qaýipsizdik sharalary saqtalady», - dedi Sh. Qarinova.
