1 shildeden bastap elektr energiiasy baǵasynyń qymbattaýy - energetikalyq qaýipsizdikti saqtaýǵa múmkindik beretin shara. Mundai pikirdi «Samuryq-Energo» AQ basqarma múshesi - qarjy jónindegi basqarýshy direktory Aidar Rysqulov bildirdi, dep habarlaidy QazAqparat.
Onyń atap ótýinshe, elektr energiiasyna tariftiń artýyna negizgi sebep - energiiany óndirýdiń ózindik qunynyń osy kúnge deiin bekitilgen shekti tariften tómen bolyp kelýi. Qazirgi ýaqytta energiianyń ózindik quny 9 teńge bolsa, tarif 7,7 teńge mólsherinde bekitilgen. Mundai jaittyń oryn alýyna elektr energiiasyn tutyný kóleminiń jyldan-jylǵa artýy, soǵan orai mazýt pen kómir tasymaly qunynyń qymbattaýy sebep bolyp otyr.
«Tariftiń artýy barlyq stansalardyń jumys jaǵdaiyna septigin tigizedi. Stansalardyń toza bastaýy únemi investitsiia salýdy qajet etedi. Osy rette tariftiń kóterilýi barlyq stansalardyń jumys istep turýyna septigin tigizedi. Bul sharalar energiialyq qaýipsizdikti saqtaýǵa, stansalardyń jospardan tys jóndeý jumystaryna toqtap qalmaýyna septigin tigizedi. Sondyqtan tarifti kóterýden jaltara almaimyz. Tolyqtai aitsa, bul - Qazaqstannyń energetikalyq qaýipsizdigi máselesi», - dedi Aidar Rysqulov.
Sonymen qatar ol elektr energiiasy baǵasynyń kóterilýi dál osy qyzmet túrin tutynatyn kásiporyndar shyǵaratyn sońǵy ónim baǵasyna da áser etýi múmkin ekendigin joqqa shyǵarmady.
«Qazaqstanda elektr energiiasyn tutyný ózge de sońǵy ónimderdiń ózindik qunynyń artýyna alyp keledi. Óitkeni, elektr energiiasynsyz qandai da bir ónim shyǵarý múmkin emes. Elektr energiiasynyń quny naqty ónimniń ózindik qunyna da tikelei áser etedi. Bir jaǵynan alyp qaraǵanda, tariftiń qymbattaýy energiiany únemdeýge de septigin tigizedi dep sanaimyz. Iaǵni, adamdar elektr energiiasyn únemdeýge daǵdylanady», - dedi ol.
