Bala jastan ekologiialyq tárbieni boiǵa sińirý qajet. Elimizdegi eń jas ekobelsendilerdiń biri Arýjan Sahariianova Memleket basshysy Qasym-Jomart Toqaevtyń elimizdegi ekologiialyq máseleni jolǵa qoiýdyń mańyzy týraly bastamasyna pikir bildirdi, dep habarlaidy Baq.kz.
«Menińshe, kóptegen balada ekologiia týraly uǵym qalyptaspaǵan, ekologiialyq jaǵdaidy qalai túzetýge bolatyny, plastiktiń qorshaǵan ortaǵa tigizer ziiany týraly bilmeidi», - deidi ol.
Arýjan elordadaǵy joǵary synyp oqýshysy. Birneshe jyldan beri óz qatarlastary men eresekterdiń arasynda minimalizm ideiasyn jáne batys elderinde tanymal Zeri waste aǵymyn nasihattap júr. Ol «nól qaldyq» degen maǵyna beredi, iaǵni bul árbirimiz shyǵaratyn qoqys kólemin azaitý degen sóz. Onyń ózi bul jolda ózgelerge úlgi kórsetýde. Qazaqstandyq mektep oqýshysyn tipti batys elderinde úkimettiń aldynda ekologiia problemasyn belsendi túrde kóterip júrgen 16 jastaǵy shvedtik Greta Týnbergpen salystyrady.
«Men kóptegen jasóspirimniń óz qurbylaryn ekologiia máselesine oqytý jónindegi jobalardy qolǵa ala bastaǵanyn baiqadym. Mekteptegi bul pán basqalarǵa da oi salyp, is-áreketti ózinen bastaýǵa, óz ómirin «eco-friendly«, iaǵni eko-nietti etýge yntalandyrady. Qaldyqtar máselesine kelsek, Qazaqstandaǵy poligondarda olar taý bop úiilip jatyr. Óitkeni halyq bul máselege selqos qaraidy. Eger biz qaldyqtardy qalai durys óńdeý kerektigin, máselen, qala syrtyna shyqqanda, tabiǵatpen qarym-qatynas mádenietin birtindep úiretetin bolsaq, onda qaldyqtar azaiǵan bolar edi. Jurtshylyq bul iske belsene qatysyp, qorshaǵan ortaǵa aialy kózqaraspen qaraýdy ózinen bastaýy kerek», - deidi Arýjan Sahariianova .
Ol túrli salada sýdy únemdi paidalanyp jatqan eshkim joq degen pikirde.
«Óńirlerdiń barlyǵy birdei taza aýyzsýmen qamtylmaǵan. Biz indýstriialyq protsesterdiń adam densaýlyǵyna áseri bar ekenin oilaýǵa tiispiz. Ekologiia baǵdarlamasyn, sonymen qatar, tabiǵi resýrstardy, onyń ishinde sýdy tiimdi ári únemdi paidalanýdyń mańyzdylyǵy týraly aqparatpen tolyqtyryp, balalarǵa ózimiz úlgi kórsetkenimiz jón degen oidamyn», - deidi Arýjan.
