Túrkistan oblysy, Ordabasy aýdanynda mektepte emtihan tapsyryp kelgen soń, óz-ózine qol jumsaǵan 15 jastaǵy qyzdyń ólimi boiynsha tergeý bastaldy, dep habarlaidy "Ult aqparat".
Alty kún buryn 9-shy synypty bitirgen Elvira Myqtybek kezekti synaq tapsyryp kelgennen soń, óz úiiniń qorasynda asylyp qalǵan bolatyn. Mektepte muǵalim bolyp jumys isteitin tórt balanyń anasy qyzynyń synyp jetekshisi bolǵan. Emtihan tapsyryp shyqqan ol úige kóńilsiz kúide kelgen.
Elviranyń óler aldynda uialy telefonyna hat jazyp qaldyryp ketkenin aitady. Biraq ony anasyna jiberip úlgermepti.
«Men jylap, eńirep júrgen kezde maǵan qyzymnyń uialy telefonyn ákelip kórsetti. Onda «mama, keshirińizshi. Sizdiń úmitińizdi aqtai almadym. Sizdiń atyńyzǵa jaqsy at keltire almadym» degen habarlamasy tur eken. Ony jibermegen. Men eshýaqytta qyzyma sen «bes» degen baǵa al nemese «bes» almasań bolmaidy, ómirdiń bári beske bailanysty qadalyp qalǵan dep qysym kórsetken emespin. Toǵyzynshy synypta barlyq páni «bes» bolǵandyqtan men ony úzdikter qataryna usyndym. Men qyzyma únemi «baǵada turǵan eshteńe joq, bir mánisi bolar» dep aityp otyratynmyn. Ózim kómektesem, birge bolamyz. Birge mamandyq tańdasyp áńgimelesip júrgenbiz», - deidi anasy.
Alaida bul oqiǵa jaiynda qazir sol kúni synaqqa birge kirgen synyptastary da, algebradan synaq alǵan muǵalimi de jaq ashpady. Tek mektep direktory marqum oqýshysyna sol kúni qysym kórsetpedim dep aqtaldy.
«Men ózim memlekettik emtihanda tóraǵa retinde maǵan oryn berdi, men sol orynda otyrdym. Eshqandai balanyń tóbesinde qarap, baryp qasyna eshteńe istegen joqpyn. Aýyr jaǵdai», - deidi mektep direktory Aisara Staeva.
Óz kezeginde mektep psihology da oqýshysynyń ne sebepti mundai qadamǵa barǵanyn túsine almai dal.
«Ol ondaiǵa baratyn qyz emes edi. Minezi ashyq, oqýshylarmen synypta jalpy qarym-qatynasy jaqsy bolatyn», - degen pikirin bildirdi psiholog Aisara Qulmaǵanbet.
Qazir osy oqiǵaǵa orai oblystyq adami áleýetti damytý basqarmasy men bilim sapasyn baqylaý departamenti tarapynan zerdeleý komissiiasy qurylyp, jumys istep jatyr.Sol kúni mektepte bolǵan muǵalimder men oqýshylardan jaýap alynýda. Mán-jaidy tolyq anyqtamaq.
«Marqum bolǵan Elvira Myqtybektiń emtihan kezinde shyǵarǵan esepteriniń bárin biz qarap jatyrmyz qazir. Zerdeleý júrip jatyr. Qorytyndysyn, nátijesin bitkennen keiin aitamyz. Bizben birge qazir tergeý oryndary da qazir jumys júrgizip jatyr. Sondai-aq, mekteptiń jaǵdaiy búginge deiingi, moraldyq psihologiialyq jaǵdaiy, qaiǵyly oqiǵanyń neden týyndaǵanyn, sonyń bárin qortyndysymen aitamyz», - deidi Túrkistan oblystyq Adami áleýetti damytý basqarmasynyń bólim basshysy Álibek Kenjebaev.
Qazir osy oqiǵa boiynsha óńirdiń Politsiia departamenti «Ózin–ózi óltirýge deiin jetkizý» babymen qylmystyq is qozǵap, tergeý amaldaryn júrgizýde. Tergeýshiler oqiǵa bolǵan kúnnen beri aýyl mektebinde ata-analar, oqýshylar men mektep ujymynan jappai jaýap alýda. Óńirdiń bas politseii Qairat Dálbekov osy isti óz baqylaýyna alǵanyn habarlady.
«Ata-ana úshin balasynyń qazasy qanshalyqty qabyrǵany qaiystyratynyn jaqsy túsinemin jáne sizderdiń qaiǵylaryńyzǵa ortaqpyn. Sondyqtan aitaiyn degenim, bul is meniń jeke baqylaýymda tur. Qyzmetkerlerge tiianaqty tapsyrmalar berildi. Iaǵni, atalǵan jait boiynsha Túrkistan oblysy Politsiia departamentiniń bilikti tergeýshilerimen QR QK-niń 105-baby «Ózin-ózi óltirýge deiin jetkizý» boiynsha sotqa deiingi tergeý jumystary júrgizilýde jáne qajetti degen barlyq jan-jaqty sharalar júzege asyrylýda. Onyń ishinde mektep ujymynan, muǵalimder men oqýshylardan jaýaptar alynýda. Tiisti saraptamalar da taǵaiyndaldy. Istiń zań aiasynda júrgizilýi qadaǵalaýda» - delingen Qairat Dálbekovtyń habarlamasynda.
Aita keteiik, marqum bolǵan jasóspirimniń denesi ótken aptada jer qoinyna tapsyryldy.
