Asia Park SOO-daǵy vaktsinatsiia pýnktinde vaktsinalanǵandardy qoldaý úshin kásipkerler túrli syilyqtar oinatty. Bul týraly "Ult aqparat" elorda ákimdiginiń resmi saityna silteme jasap habarlady.
Vaktsinatsiialanǵan azamattar vaktsinatsiia alǵannan keiin birden utys oiynyna qatysa aldy. Júldeler arasynda: turmystyq tehnika, elektronika, SOO jalǵa alýshylarynyń syilyqtary bar.
Elorda turǵyndary kásipkerlerdiń osyndai bastamasyn joǵary baǵalap, baǵaly syilyqtar úshin alǵysyn bildirdi.
«11 mamyrda vaktsinanyń alǵashqy komponentin aldym. Masa shaǵyp alǵandai ǵana boldy. Jyl saiyn kúzde tumaýǵa qarsy ekpe alatynym da bar. Búgin koronavirýsqa qarsy vaktsinanyń ekinshi komponentin aldym. Aýyrsyný bolǵan joq, qysymym qalypty. Men tipti utys oiynynda sháinek sekildi syilyq alamyn dep kútken joqpyn. Óte qýanyshtymyn! Tanystarymnyń bárin vaktsina qabyldaýǵa shaqyramyn, óitkeni bárimizge ujymdyq immýnitet qajet», — dedi 69 jastaǵy zeinetker Larisa Vasilevna.
Elordanyń taǵy bir turǵyny Bibigúl Ahmetova vaktsinatsiiadan keiin syilyq alamyn dep oilamaǵanyn atap ótti.
«Búgin vaktsinanyń ekinshi komponentin alýǵa keldim. Al alǵashqy dozasynan keiin keri áseri bolǵan joq. Qazir ózimdi jaqsy sezinemin. Bul jerde utys oiyny ótedi dep kútpegen edim. Qatty tań qaldym. Syilyq úshin rahmet!» — dedi áiel.
Aktsiiany uiymdastyrýshylar atap ótkendei, utys vaktsinatsiiadan ótken adamdardy yntalandyryp, jaqsy kóńil-kúi syilaý úshin ótkiziledi.
Qalalyq emhananyń dáriger-epidemiology Perizat Shahmanovanyń aitýynsha, vaktsinatsiia pýnkterinde Spýtnik V, QazVac jáne Hayat-Vax vaktsinalary usynylady. Egý pýnkti ashylǵannan keiin bir ai ishinde 300-ge jýyq adam ekpe qabyldady.
Esterińizge sala keteiik, elordada KVI-ǵa qarsy vaktsinatsiialaýdyń 100-den astam pýnkti ashylǵan: BMSK mekemelerinde, sondai-aq iri SOO-lar men saýda úilerinde. Olardyń qatarynda «Mega Silk Way», «Keruen», «Han Shatyr», «Saryarqa», «Eurasia», «Abý-Dabi Plaza», «Aziia Park», «Big Shanhai», Ortalyq bazar, «Álem» jáne «Astanalyq» bar. Vaktsinatsiia pýnktteri demalyssyz saǵat 10:00-den 22:00-ge deiin jumys isteidi.
Sondai-aq, halyqtyń joǵary belsendiligin eskere otyryp, Qoǵamdyq densaýlyq saqtaý basqarmasy kóshpeli brigadalar uiymdastyryp, eńbek ujymdaryn jappai vaktsinatsiialaýǵa kiristi.
