Elordada «Kerýen» saýda ortalyǵynda bótelkelerdi qaita óńdeýge qabyldaityn «Fandobox ecoplatform» avtomaty iske qosyldy, dep habarlaidy QazAqparat.
Plastikti óńdeýden alynǵan shikizatty bolashaqta jańa qaptama óndirisinde qoldanýǵa bolady. Sharaǵa QR Ekologiia, geologiia jáne tabiǵi resýrstar ministri Maǵzum Myrzaǵaliev arnaiy qatysty.
«Búgin elorda tarihyndaǵy mańyzdy kún dep oilaimyn, 5 maýsym – «Dúniejúzilik qorshaǵan ortany qorǵaý kúni» ótedi, sonyń qarsańynda elordada bótelkeler qabyldaityn birinshi apparat qoiyldy. Óz kezeginde bizdiń ministrlik osyndai fandomattar ornatýǵa kómek pen qoldaý kórsetýge daiyn», - dedi Ekologiia ministri.
Apparatty ornatý týraly bastamaǵa «Galmart» sýpermarketi qoldaý kórsetken.
«Bul sharanyń Dúniejúzilik qorshaǵan ortany qorǵaý kúni qarsańynda ótkenine óte qýanyshtymyz. Mundai fandomattardyń bolashaǵy zor dep oilaimyn. Endi tabiǵatty lastamaýǵa, plastik jinaýǵa múmkindik bar. Fandomattar turǵyndar arasynda tanymal bolatynyna úmittenemiz. Biz tabiǵatqa qamqorlyq jasaimyz jáne qorshaǵan ortany taza ustaý úshin qoldan kelgenniń bárin jasaimyz», - deidi Galmart jelileriniń bas direktory Madina Shahbýtova.
Apparat kólemi 0,5-ten 2 litrge deiingi plastik bótelkelerdi, aliýminii bankalardy shtrih-kodymen qabyldaidy. Olardyń ishinde suiyqtyq bolmaýy tiis. Aldymen qolaily bótelkeniń nemese bankanyń shtrih-kodyn kórsetý kerek. Bótelke kórsetilgen ólshemderge sáikes kelse, apparat ony qabyldaidy. Birneshe bótelke nemese banka tapsyrǵyńyz kelse de, olardy kezek-kezek salý kerek.
«Bul reseilik kompaniianyń ázirlemesi. Ázirge apparat Almaty men Nur-Sultandaǵy eki saýda-oiyn-saýyq ortalyǵynda ornatyldy. Ai sońyna deiin «Kerýen City», «Talan Towers» saýda ortalyqtary men Galmart sýpermarketter jelilerine fandomattar ornatýdy josparlap otyrmyz. Barlyǵy 15 fandomat ornatylady», - dedi ecoplatform kompaniiasynyń direktory Ádilet Nurselinov.
Halyqty yntalandyrý maqsatynda plastikalyq bótelkelerdi tapsyratyn turǵyndarǵa bonýstar beriledi. Bonýsty telefon nómiri nemese bank kartasyn tirkeý arqyly jinaýǵa bolady.
«Iaǵni, Galmart klienti sýpermarkettiń mobildi qosymshasyn júkteidi, avtorizatsiia jasaidy jáne belgili bir derbes shot ashady, oǵan saýda-oiyn-saýyq ortalyǵy aýmaǵynda jumsaýǵa bolatyn bonýstar jinaqtalady. Sondai-aq Kaspi-men de kelissózder júrgizip jatyrmyz. Kelissózder sátti ótse, halyq ekologiialyq jobaǵa kóbirek qyzyǵýshylyq tanytar edi», - deidi Ádilet Nurselinov.
