Elordada koronavirýs juqtyrý kórsetkishi 1 aptada 40 paiyzǵa artyp ketti. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Qazaqstanda 22 maýsymǵa deiin COVID-19-dyń oń nátijesimen 410 523 naýqas jáne 56 546 KVI- jaǵdaiy tirkeldi. Qazaqstan Respýblikasy «sary» aimaqta. «Qyzyl» aimaqta Nur-Sultan qalasy qalyp otyr. Qalǵan óńirler «sary» jáne «jasyl» aimaqta tur. Sońǵy aptada koronavirýs infektsiiasymen aýrý ósimi 4 paiyzǵa artqany baiqalady. Bul Nur-Sultan qalasynda buǵan deiingi aptamen salystyrǵanda tirkelgen jaǵdailar sanynyń 40 paiyzǵa artýymen bailanysty», - dedi Aleksei Tsoi.
Onyń dereginshe, aýrýhanalardaǵy infektsiianyń tósek-oryndardyń júktemesi 25 jáne jansaqtaý bólimderinde 21 paiyzdy qurap otyr.
«Aýrý kórsetkishi joǵary bolǵan 7 óńirde infektsiialyq ta, reanimatsiialyq ta tósek-oryndar júktemesiniń tómendeýi baiqalady», - dedi ministr.
