Elordada karantindik shekteýlerdi kúsheitý týraly jańa qaýlyǵa sáikes, 27 maýsymnan bastap saýda, oiyn-saýyq ortalyqtarynyń, dámhanalar men meiramhanalardyń senbi jáne jeksenbi kúnderi jumys isteýine tyiym salynady, dep habarlaidy "Ult aqparat" ákimdikke silteme jasap.
Nur-Sultan qalasynyń bas memlekettik sanitarlyq dárigeriniń jańa qaýlysy 2021 jylǵy 22 maýsym kúni QR aýmaǵynda koronavirýs infektsiiasynyń paida bolýy men taralýyna jol bermeý jónindegi vedomstvoaralyq komissiia otyrysynyń hattamasy negizinde qabyldanǵan bolatyn.
Qujatqa sáikes, saýda, oiyn-saýyq ortalyqtarynyń jumys kestesi ózgertildi.
Erteńnen bastap SOO-lar COVID-19-ǵa qarsy vaktsinalaý pýnkteri ornalasqanyna qaramastan, dúisenbi-juma kúnderi saǵat 10:00-den 17:00-ge deiin ǵana jumys isteidi. Saýda, oiyn-saýyq ortalyǵynda ornalasqan azyq-túlik jáne birinshi kezekte qajetti zattardy satatyn shaǵyn marketterge, sýpermarketter, gipermarketter men dárihanalarǵa bul shekteý qoldanylmaidy.
Fýdkorttardyń jumysy tamaqty ózimen birge alyp ketý nemese jetkizý tártibi boiynsha jumys isteidi. Bul «Ashyq» jobasyna qatysatyn fýdkorttarǵa qoldanylmaidy.
Al túrli aktsiialar, jármeńkeler, shoýrýmdar, oflain formattaǵy utys oiyndaryn ótkizýge tyiym salynady.
Sondai-aq qaladaǵy dámhanalar men meiramhanalardyń da jumys ýaqyty qysqartylatyn bolady.
«Ashyq» jobasyna qatysatyn obektilerdi qospaǵanda meiramhanalar, dámhanalar, kofehanalar tipindegi (ǵimarattardyń ishinde) qoǵamdyq tamaqtaný nysandarynyń jumysyn ornalasqan jerine qaramastan, kúsheitilgen sanitariialyq-epidemiiaǵa qarsy, sanitariialyq-profilaktikalyq is-sharalardy jáne kórshiles ústelderdiń shetki oryndary arasynda keminde 2 metr áleýmettik qashyqtyqty saqtai otyryp, toltyrylýy 50%-ǵa deiin, biraq 30 orynnan aspaityn sharttardy qamtamasyz etýi kerek.
Osy jaǵdaida jumys kúnderi saǵat 07:00-den 20:00-ge deiin jumys kestesin belgileýmen, senbi jáne jeksenbi kúnderi jumystaryna tyiym sala otyryp uiymdastyrylýy tiis», — delingen qaýlyda.
