Elorda oqýshylary Aqmola oblysy aýmaǵynda ornalasqan 2 lagerde jazǵy demalysyn ótkize alady. Bul týraly Nur-Sultan qalasy Bilim berý basqarmasy basshysynyń orynbasary Rimma Imangazinova aitty.
«Jazǵy kezeńde balalardyń saýyqtyrý demalysyn, bos ýaqytyn jáne jumyspen qamtylýyn uiymdastyrý memlekettiń áleýmettik saiasatynyń ajyramas bóligi ári balalardyń shyǵarmashylyq damýy úshin múmkindik sanalady. Demalys - ol oqý sabaqtarynan bos ýaqyt, balaǵa erekshe nazar aýdaratyn, ony álemettik jaǵynan qorǵaityn aimaq. Ózderińiz biletindei, elordada karantindik sharalar saqtalýda. Osyǵan bailanysty biz ata-analardyń balalar densaýlyǵyna alańdaityndyǵyn túsinemiz. QR Bilim jáne ǵylym ministrligi kelesi qala syrtyndaǵy lagerlerdiń jumysy arqyly balalar úshin jazǵy demalysty biyl «Qazaqstan balalary jazdy qýanyshpen qarsy alady» atty uranmen uiymdastyrady: 240 oryndyq «Arman» týristik saýyqtyrý kesheni, 160 oryndyq «Býrovichok» saýyqtyrý lageri», - dedi basqarma basshysynyń orynbasary.
Onyń atap ótýinshe, atalǵan lagerler qaladan 100 shaqyrym jerde, Aqmola oblysynda ornalasqan. Olarda balalardyń jazǵy lagerlerin barlyq sanitarlyq normalardy saqtai otyryp, 10 kúnge 5 aýysymda 7 maýsymnan 10 tamyzǵa deiin uiymdastyrý josparlanǵan.
«Qyzyl» aimaqta bolǵan kezde lagerlerdiń tolymdylyǵy 30 paiyzdy quraidy. «Sary» aimaqta - 50 paiyzǵa deiin, «jasyl» aimaq - shekteýsiz. Búginde sanitarlyq baqylaý basqarmasy men Aqmola oblystyq tótenshe jaǵdailar departamentinen ruqsat qujatyn alý jumysy júrgizilip jatyr. Onyń ishinde aǵash qurylymdardy ottan qorǵaý boiaýymen óńdeý, elektr, órt dabylyna kelisimsharttar jasasý jáne basqa da jumys jasalyp jatyr. Shtattyq qyzmetkerler quryldy», - dedi Rimma Imangazinova.
Sondai-aq, onyń dereginshe, elordada Ál-Farabi, Mahambet Ótemisuly atyndaǵy oqýshylar sarailarynyń bazasynda balalardyń jazǵy demalysyn uiymdastyrý josparlanyp otyr.
