Memlekettik qoldaýdyń nátijesinde tómen sapaly tuqymdardy paidalaný paiyzy 2016-2020 jyldary 7,2%-ǵa deiin tómendedi. Bul týraly Úkimet otyrysynda Aýyl sharýashylyǵy ministri Saparhan Omarov málim etti, dep habarlaidy QazAqparat.
«2021 jyldyń ónimine respýblika boiynsha 2,5 mln tonna tuqym daiyndalǵan bolatyn, olar egis konditsiialaryna tolyq sáikes keldi. Egilgen sorttyq tuqymdardyń jartysynan kóbi qazaqstandyq selektsiiaǵa jatatynyn atap ótý qajet. Otandyq tuqym ósirý sharýashylyqtaryn zamanaýi selektsiialyq jáne tuqym tazalaý tehnikasymen jaraqtandyrý boiynsha jumys júrgizilýde. Memlekettik qoldaýdyń nátijesinde tómen sapaly tuqymdardy paidalaný paiyzy 2016-2020 jyldary 7,2%-ǵa deiin tómendedi, elitalyq tuqymdardyń úlesi 6,8%-ǵa deiin ósti», - dedi S. Omarov.
Onyń aitýynsha, úshinshi reprodýktsiiadan tómen emes tuqymdardy paidalaný boiynsha jaqsy kórsetkish Soltústik Qazaqstan (100%), Batys Qazaqstan (99,2%) jáne Almaty (98,7%) oblystarynda baiqalady. Joǵary reprodýktsiialy tuqymdardy qoldanýdyń eń tómen kórsetkishi - Túrkistan (71,4%) jáne Jambyl (77,3%) oblystarynda.
«Bul rette, Jambyl, Túrkistan jáne Pavlodar oblystary boiynsha joǵary reprodýktsiialy tuqymdardy paidalaný úlesi jyl saiyn tómendep keledi. Aqmola, Qostanai jáne Qyzylorda oblystary boiynsha oń dinamika baiqaldy. Bul kórsetkishti arttyrý úshin oblystar sharýashylyqtardy tuqym sharýashylyǵyn sýbsidiialaýmen neǵurlym tolyq qamtýlary qajet. Biylǵy oblystardyń jergilikti biýdjetterinde tuqym sharýashylyǵyn damytýdy sýbsidiialaýǵa 11,7 mlrd teńge kózdelgen, respýblikalyq biýdjetten qosymsha 4,3 mlrd teńge bólindi», - dedi ministr.
