Táýelsizdiktiń 30 jyldyǵy qarsańynda elordada «Nur Otan» partiiasynyń jastar qanaty uiymdastyrǵan «Jastar – Otanǵa!» syilyǵyn saltanatty tapsyrý rásimi ótti. Eń belsendi volonterler, janashyr metsenattar men qoǵamdyq uiymdar 7 nominatsiia boiynsha marapattaldy.
Sondai-aq, birqatar jas belsendiler bilim berý, densaýlyq saqtaý, áleýmettik qorǵaý salalaryndaǵy jemisti eńbegi jáne COVID-19 pandemiiasymen kúreste erekshe kózge túskeni úshin Memleket basshysynyń Jarlyǵymen bekitilgen «Halyq alǵysy» medalimen marapattaldy.
Marapattaý rásimi barysynda «Nur Otan» partiiasy Tóraǵasynyń Birinshi orynbasary Baýyrjan Baibek egemendik jariialanǵan alǵashqy kúnnen bastap elimizde jastardy qoldaýǵa jáne olardyń óz qabiletin júzege asyrýyna jaǵdai jasaýǵa erekshe nazar aýdarylǵanyn atap ótti.
Táýelsizdiktiń tańy atqan alǵashqy jyldary kúrdeli ekonomikalyq jaǵdaiǵa qaramastan, Elbasy, elimizdiń Tuńǵysh Prezidenti Nursultan Nazarbaev «Bolashaq» halyqaralyq stipendiiasyn taǵaiyndady. Sonyń arqasynda 14 myńnan astam adam álemniń úzdik oqý oryndarynda bilim aldy.
Ótken jyly Memleket basshysy Qasym-Jomart Toqaev Parlamentke jáne jergilikti ókildi organdarǵa sailaý partiialyq tizimderinde jastarǵa kvota belgiledi. Bul olardyń eldegi qoǵamdyq-saiasi protsesterge belsendi atsalysýyna yqpal etetin bolady.
Jastardyń ómir súrý deńgeiin jáne áleýmettik jai-kúiin arttyrý jónindegi naqty sharalar 2025 jylǵa deiingi «Jastar – Otanǵa!» baǵdarlamasynda kórsetilgen.
«Ózderińiz biletindei, pandemiianyń birinshi tolqyny kezinde 5 myń jasotandyq Elbasy bastamashylyq etken «Biz Birgemiz!» jalpyulttyq aktsiiasy aiasynda 320 myń otbasyǵa ataýly kómek kórsetti. «Jas Otan» belsendileri Arys pen Maqtaaraldy qalpyna keltirýge de atsalysty. «Jas Otan»-nyń qoldaýymen qurylǵan «Biz Birgemiz!» volonterlik qozǵalysynyń qatysýshylarymen maýsym aiynda ótken kezdesý barysynda «Jastar – Otanǵa!» syilyǵy taǵaiyndalǵanyn jariialaǵan edik. Biz búgin sony qorytyndylaimyz», - dedi Baýyrjan Baibek.
Onyń aitýynsha, partiia jastardyń bastamalaryn, onyń ishinde volonterlikti kótermelei otyryp, odan ári de jan-jaqty qoldaýdy jalǵastyrady.
Elimizdegi ár aýdan, qala men oblysqa arnalǵan «Jastar-Otanǵa!» baǵdarlamasyn júzege asyrý aiasynda jyl basynan beri volonterlik jumysqa 60 myńnan astam jas tartyldy. Birqatar óńirlerde jastardyń turǵyn úi baǵdarlamalary qabyldanyp, talapkerlerge 75 myń grant bólindi, stýdentterdiń shákirtaqysy 2 esege, al rezidentter, magistranttar men doktoranttardyń stependiiasy 1,5 eseden astamǵa kóbeitildi.
Partiianyń jastarǵa arnalǵan sailaýaldy ýádeleriniń oryndalýyn baqylaýdy «Nur Otan» partiiasynyń Májilis pen barlyq deńgeidegi máslihattardaǵy 600-den astam halyq qalaýlylarynan turatyn Jas depýtattar korpýsy júzege asyrady. Jastar saiasaty salasyndaǵy ózekti máseleler partiianyń respýblikalyq jáne óńirlik qoǵamdyq keńesteri alańynda da qaralýda.
Partiianyń baspasóz qyzmeti atap ótkendei, Qazaqstannyń túkpir-túkpirinen 16-35 jas aralyǵyndaǵy 230 adam syilyq laýreattary retinde iriktelip alynǵan. Úzdikterdi anyqtaý úshin qurylǵan arnaiy komissiianyń quramynda Májilis depýtattary, qoǵam qairatkerleri, blogerler jáne t.b. boldy.
Sonymen, «Úzdik volonter» nominatsiiasynda «Biz birgemiz!» aktsiiasyna belsendi qatysqany úshin Batys Qazaqstan oblysynan Nursultan Qabaev pen Eýropa elderinde granttyq negizde jastardy oqytýdy uiymdastyrǵan shymkenttik Danara Saranova marapattaldy.
«Jyldyń jas qaharmany» atalymynda Jambyl oblysynan kelgen Jaqsylyq Áshirbaev syilyqqa ie boldy. Ol biyl tamyz aiynda áskeri bólimniń qoimasyndaǵy órtti sóndirýge qatysyp, jaraqat alǵan.
«Jas Otan» Jastar qanatynyń jyl belsendisi» nominatsiiasynda Shyǵys Qazaqstan oblysynan Ásem Shalqarova, Túrkistan oblysynan Nuraiym Qýandyq jáne Aqtóbe oblysynan Álisher Tynyshtyq úzdik dep tanyldy.
«Áleýmettik jelilerde volonterlikti nasihattaǵany úshin» atalymy boiynsha syilyqty tanymal bloger Janserik Qadyrbaev aldy.
Qan donorlyǵy boiynsha mobildi qosymsha – «Donorym» jobasy úshin Qaraǵandy oblysynan Rýzi Shihov «Úzdik stýdenttik joba» nominatsiiasyna ie boldy.
Jyldyń úzdik volonterlik jobalary «Love and Pet Atyrau» jáne «Biz Birgemiz» volonterlik qozǵalysy boldy.
«Jas Otan» Jastar qanatynyń aimaqtyq úzdik filialy» nominatsiiasy boiynsha Shymkent jáne Nur-Sultan qalalarynyń filialdary jeńimpaz atandy.
