Elimizde balalar men jasóspirimderge arnalǵan shyǵarmashylyq úiirmeler men sporttyq sektsiialardy jan basyna qarjylandyrýdy kózdeitin normalar engizildi.
Bul týraly Ortalyq kommýnikatsiialar qyzmetinde ótken brifingide aityldy, dep habarlaidy QazAqparat.
«Memleket basshysy Qasym-Jomart Toqaevtiń 2020 jyldyń qyrkúiegindegi «Jańa jaǵdaidaǵy Qazaqstan: is-qimyl kezeńi» atty Joldaýyn iske asyrý jónindegi jalpyulttyq is-sharalar josparynda Mádeniet jáne sport ministrliginiń aldyna elimizdiń turǵyndaryn eń aldymen balalardy buqaralyq sport túrlerimen ainalysýǵa belsendi tartý, sport sektsiialaryn ashý jáne balalar úiirmeleriniń qyzmetin qaita jandandyrý mindeti qoiylǵan bolatyn. Osy oraida Zańnama jáne memlekettik tapsyrys institýtyn engizý arqyly balalar men jasóspirimderge arnalǵan shyǵarmashylyq úiirmeler men sporttyq sektsiialardy jan basyna qarjylandyrýdy kózdeitin normalar engizildi. Osy jumystardyń atqarylýyna belsendi atsalysqan QR Bala quqyqtary jónindegi ýákil Arýjan Sainǵa úlken alǵysymyzdy aitamyz», - deidi QR Mádeniet jáne sport vitse-ministri Nurǵisa Dáýeshov.
Onyń aitýynsha, bul taraptaǵy jumystar ministrliktiń, jergilikti atqarýshy organdar men basqa da memlekettik organdardyń birlese jumys isteýi arqasynda jalǵasyp jatyr.
«Birinshi kezekte, Mádeniet jáne sport ministrliginiń buiryǵymen kelesi quqyqtyq aktiler bekitilip, qabyldandy. Birinshi, balalar men jasóspirimderge arnalǵan shyǵarmashylyq úiirmelerge memlekettik shyǵarmashylyq tapsyrysty ornalastyrý jáne olardyń jumys isteý qaǵidalary. Ekinshi, balalar men jasóspirimderge arnalǵan shyǵarmashylyq úiirmelerge jan basyna normativtik qarjylandyrý qaǵidalary. Úshinshi, memlekettik tapsyrysty jan basyna normativtik qarjylandyrý ádistemesi. Tórtinshi, balalar men jasóspirimderge arnalǵan shyǵarmashylyq úiirmelerdiń jáne sporttyq sektsiialardyń reitingin anyqtaý qaǵidalary. Memlekettik shyǵarmashylyq jáne sporttyq tapsyrys 4 jastan 18 jasqa deiingi balalarǵa, onyń ishinde erekshe qabiletteri bar balalarǵa qoldanylatyn bolady. Shyǵarmashylyq úiirmeniń 59 túri qarastyrylǵan. Ár balanyń qyzyǵýshylyǵyna qarai memlekettik shyǵarmashylyq, sport jáne qosymsha bilim berý tapsyrystar aiasynda kózdelgen 2 úiirmege tegin qatysýǵa bolady», - deidi ol.
