Dárihanalardy qajetti dári-dermektermen qamtamasyz etý máselesi qatań qadaǵalaýda bolýy tiis. Mundai pikirdi Senat depýtaty Nurtóre Júsip bildirdi, dep habarlaidy QazAqparat.
«Búgin Qazaqstan Respýblikasynyń Prezidenti Qasym-Jomart Toqaev halyqqa televiziialyq úndeý jasady. Memleket basshysy qazir álemdegi pandemiiaǵa bailanysty qalyptasqan jaǵdaidyń óte kúrdeli ekendigin atap ótti. Álem boiynsha jáne Qazaqstanda koronavirýstyń taralýy báseńdemei otyr. Keibir elderde bul indet qaitadan ýshyǵyp bara jatyr. Prezident «Álem boiynsha osy virýsty juqtyrǵandardyń sany shamamen 12 millionǵa jetti, sonyń saldarynan 500 myńnan astam adam qaitys boldy. Sol sebepti, birqatar elderde karantin tártibi qaita kúsheitilip, áýe, kólik qatynasy qaitadan shekteldi. Ókinishke qarai, bizdiń eldegi jaǵdai da ońai bolyp turǵan joq. Memlekettik komissiianyń sheshimimen 5 shildeden bastap elimizde eki aptalyq merzimge karantin sharalary engizildi. Bul asa qajetti sheshim boldy. Jaǵdaidyń turaqtalatyny sózsiz. Onyń alǵashqy belgileri de bar. Sondyqtan, aldaǵy eki apta bizdiń bolashaq qadamdarymyz úshin sheshýshi kezeń bolmaq. Barlyq azamattardy taǵy da karantin erejelerin qatań saqtaýǵa shaqyramyn. Indetpen kúrestiń nátijeli bolýy, eń aldymen, barsha jurttyń sanaly áreketi men jaýapkershiligine bailanysty», - dep atap ótti. Bizdiń elimizdegi jaǵdai qatty alańdatarlyq, tipti SOS dabylyn qaǵatyn deńgeige jetti. Kún saiyn áleýmettik jelide qaitys bolǵan azamattar týraly qazanama kóbeidi. Qaiǵy arqalaǵan áýletter qatary artyp barady. Et jaqyn týystarynan airylǵan otbasylarǵa kóńil aitamyz», - dedi senator.
Nurtóre Júsip Prezidenttiń: «Densaýlyq saqtaý júiesi indetke toitarys berýge daiyn bolǵan joq. Osy másele boiynsha biz tergeý júrgizemiz jáne bul jaǵdaidan sabaq alamyz. Ákimderdiń jibergen qatelikterine tiisti baǵa beremiz», dep máseleni ashyq aitqandyǵyna nazar aýdartady.
«Memleket basshysy pandemiiamen kúresýge 150 mlrd teńgeden astam qarjy bólingenin aitty. Memleket tarapynan barlyq qajetti sharalar qabyldanyp jatqany belgili. Alaida, bólingen qarajat qanshalyqty tiimdi jumsalyp jatyr? Halyq dárihanadan qarapaiym paratsetomoldyń ózin tappai qinalyp qaldy. Bul turǵyda qatań tekseris jasalýy kerek. Halyqtyń densaýlyǵy – basty bailyq.Memleket basshysy «Ár qazaq – meniń jalǵyzym» degendei, ár azamatymyzdyń qazasy meniń júregime qatty batady. Mynaý alapat indet aramyzdan talai asyldarymyzdy julyp áketýde. Búginde qara jamylyp otyrǵan azamattardyń qaiǵylaryna ortaqtasyp, kóńil aitamyn. Sol úshin 13 shildeni – Ulttyq aza tutý kúni dep jariialaimyn», - dedi. Bul ádil sheshim», - dedi ol.
Senator beibit zamanda el-jurt qynadai qyrylyp, qaiǵydan qan jutyp jatqanyn, álemdik deńgeide indet keń tarap otyrǵandyǵyn basa aitady.
«Bizdiń elimizdegi jaǵdaidyń qandai ekenin bárińiz kórip bilip otyrsyzdar. Endigi kezekte bala-shaǵamyz ben óz densaýlyǵymyz úshin jaýapkershilik alatyn ýaqyt jetti. «Indet joq» degen sózge senýge bolmaidy. Onyń qanshalyqty qaýipti ekenin jan-tánimizben sezinip jatyrmyz. Qazir azamattar ózimen ózi qaldy. Qiyndyqtarmen betpe-bet ushyrasyp, árkim óz bilgen áreketimen jan saqtaýǵa umtylyp jatyr. Osy rette Prezidenttiń «Dárigerlerimiz buqaralyq aqparat quraldary arqyly azamattarǵa naqty, birizdi málimet berýi kerek. Dertti emdeýdiń neshe túrli joldaryn kórsetip, adamdardyń densaýlyǵyna qaýip tóndirýge bolmaidy. Bundai áreketterge tosqaýyl qoiý kerek. Qylmystyq kodekstiń 174-babyna sáikes jalǵan aqparat taratqan adam jaýapqa tartylady. Quqyq qorǵaý organdary el ishindegi osyndai jónsizdikke qatysty qatań sharalar qoldanatyn bolady. Sol siiaqty dári-dármektiń baǵasyn birneshe ese ósirip, qalyptasqan jaǵdaidy óz maqsatyna paidalanǵysy kelgen alypsatarlardy da quqyq qorǵaý organdary meniń tapsyrmama sáikes jaýapqa tarta bastady. Qazir memlekettik organdar eldi mekenderdi qajetti dári dármekpen tolyq qamtamasyz etýde. Osyǵan orai, tiisti qor jasaqtalǵan. Tósek oryndary da, meditsinalyq qyzmet kórsetý isi de tolyǵymen qamtamasyz etiledi» degen sózderi dátke qýat bergendei», - dedi ol.
Onyń atap ótýinshe, dárihanalardy qajetti dári-dermektermen qamtamasyz etý máselesi qatań qadaǵalaýda bolýy tiis. Alypsatarlar men alaiaqtardyń jolyn kesý qajet. Qazaqstannyń quqyq qorǵaý organdary bul máselemen jedel túrde ainalyspasa jaǵdai ýshyǵyp ketýi múmkin.
«Memleket basshysy Qasym-Jomart Toqaev Qazaqstan halqyna arnap jasaǵan Úndeýinde birqatar naqty tapsyrmalar berdi. Munyń bári eń aldymen halyqty asa qaýipti indetten aman saqtap qalý úshin jasalyp jatyr. Sondyqtan, osynaý syn saǵatta bárimizge tastai jumylyp, alapat indetke qarsy birigip kúresýden basqa amal joq. Ár shańyraq aman bolsyn! Ár áýlet qara jamylmasyn! Amandyqqa eshteńe jetpeidi!», - dedi Nurtóre Júsip.
