Qazaqstanǵa eresek azamattarǵa arnalǵan tólqujattyń betteri artýy múmkin. Bul týraly QR Parlamenti Májilisiniń depýtaty Erlan Smailov málim etti, dep habarlaidy QazAqparat.
«Shetelge jii shyǵatyn azamattarǵa yńǵaily bolý úshin eresek azamattarǵa arnalǵan tólqujattyń betterin 48-ge deiin arttyrý usynylyp otyr. Qazirgi tólqujatta 36 bet bar. Árine, bul kóbeigennen keiin onyń baǵasy da ósedi. 8 AEK-tan (ailyq eseptik kórsetkish) 12 AEK-ke deiin. Sebebi bul ózgeris shet memleketterge jumys babymen jii bolatyn azamattar úshin óte yńǵaily. Olar Qazaqstanmen qatar basqa da elderdiń shekarasynan ótedi. Degenmen búgingi 36 betti tólqujat qoldanysta qala beredi, merzimi de sol kúiinshe 10 jylǵa deiin jaramdy bolmaq», - dedi Erlan Smailov Májilistiń zańnama jáne sot-quqyqtyq reforma komitetiniń otyrysynda jasaǵan baiandamasynda.
Sondai-aq, depýtat 36 betti tólqujatqa arnalǵan memlekettik baj kólemin ózgertpeý kerektigin aitty.
«Tólqujat paraqtarynyń sanyn kóbeitý shetelge jii shyǵatyn azamattardyń shekaradan erkin ótýi men kóptegen elde bolýyna múmkindik beredi. Jáne jańa viza alý úshinde oń áseri bolady. Mysaly, azamattyń 5 jyldyq Shengen vizasy bar, biraq onyń tólqujatynda shekarany ótkeni týraly belgini qoiýǵa arnalǵan paraqtar sany bitip qaldy. Bul jaǵdaida ol jańa tólqujat rásimdep, vizany jańa tólqujatqa aýystyrý úshin shetel elshiligine qaita habarlasýy kerek. Bul óz kezeginde artyq sharýa jáne táýekelge alyp kelýi múmkin», - deidi ol.
