QR Premer-Ministri Asqar Mamin elektr kóliginiń kóbeiýin yntalandyrý jumystaryn jalǵastyrýdy tapsyrdy, dep habarlaidy QazAqparat.
«Ekologiialyq qaýipsizdik jáne shyǵaryndylardy azaitý álemniń kóptegen eliniń halyqaralyq jáne ishki saiasatynyń mańyzdy elementi bolyp sanalady. Álemniń jetekshi elderi 2050-2060 jyldarǵa qarai parniktik gazdar shyǵaryndysynyń nóldik deńgeiine qol jetkizý maqsatyn qoiyp otyr. Memleket basshysy Qasym-Jomart Kemeluly Toqaev ekologiialyq ahýaldy jaqsartý máselesin basym mindetterdiń biri ekenin belgiledi», - dep atap ótti Premer-Ministr Úkimettiń búgingi otyrysynda.
Sonymen birge «Nur Otan» partiiasynyń baǵdarlamasyn oryndaý aiasynda 2 mlrd aǵash otyrǵyzý jumystary jáne eldiń soltústik óńirlerin gazdandyrý júrgizilýde, qoqys óńdeitin 6 zaýyt salynatyn boldy.
«Atmosferanyń lastanýyndaǵy máseleleriniń biri - avtokólik quraldary shyǵaratyn gaz. Qoǵamdyq kólik gazǵa kóshirilip jatyr. Avtoparkti jańartý boiynsha keshendi sharalardy odan ári iske asyrý, otyn sapasy men shyǵaryndylar mólsherin baqylaýdy kúsheitý qajet. Elektr kóliginiń kóbeiýin yntalandyrý jumysyn jalǵastyrý kerek, mysaly, jýyrda elektromobilderdi kádege jaratý alymy joiyldy. Ekologiialyq turǵydan tiimdi jumys istemeitin kásiporyndar men jylý elektr ortalyqtarynyń shyǵaryndylary kólemin azaitý qajet», - dedi Asqar Mamin.
Úkimet basshysynyń aitýynsha, 2025 jylǵa qarai qabyldanyp jatqan sharalar 10 qalada atmosferanyń lastaný indeksin joǵary deńgeiden ortasha deńgeige deiin tómendetýge jáne jalpy aýa sapasyn jaqsartýǵa múmkindik beredi.
