Foto: gov.kz
Respýblika kúni qarsańynda dziýdodan Parij Olimpiadasynyń chempiony Eldos Smetov pen onyń bapkeri Ǵalymjan Jylgeldiev baspanaly bolǵan aqtóbelikterdiń qýanyshyna ortaqtasty. Olar Qobda aýdanynda tasqyn kezinde úisiz qalǵan otbasyna baryp, sportpen ainalysatyn balalarǵa syilyq tabystady.
Sonymen qatar aýyl turǵyndaryn Respýblika kúnimen quttyqtady. Sportshy Jibek Joly telearnasyna bergen suqbatynda tasqynnan zardap shekken turǵyndar jańa baspanaǵa ie bolǵanyna qýanyshty ekenin jetkizdi. Eldos Smetov pen Ǵalymjan Jylgeldiev kóktemgi sý tasqynynnan zardap shekken otbasylardyń úilerine bardy. «Qutty qonaq keldi» dep qarsy alǵan turǵyndardyń qýanyshynda shek bolmady.
«Memleket basshysynyń tapsyrmasymen keremet, záýlim baspanalar salynǵan eken. Sol salynǵan úilerdiń bárin óz kózimmen kórip, turǵyndarmen kezdestik. Tutas, jańa aýyl paida bolǵan. «Qiyndyqta dalada qaldyrmady» dep turǵyndar raqmetin aityp jatyr. Men óte qýanyshtymyn», - dedi E.Smetov.
Batyrlar mekeni atanǵan Qobdada sportshy jastarmen, jasóspirimdermen kezdesti. Mundaǵy maqsat – jastardyń sportqa degen qyzyǵýshylyǵyn oiatý, olarǵa jiger berý. Chempion aýyl jastaryna aqyl-keńesin aityp, jetistikke jetý jolyndaǵy tájiribesimen bólisti. Birinen soń biri kezekke turǵan bolashaq sportshylardyń suraqtaryna jaýap berdi. Eldos Smetov elimizde buqaralyq sporttyń damýyna den qoiylyp jatqanyn atap ótti.
«Aldymen, barshańyzdy ulttyq merekemiz Respýblika kúnimen quttyqtaimyn. Egemendiktiń arqasynda elimiz kórkeiip keledi. Olimpiadadan keiin alǵash bolyp Aqtóbe oblysyna kelip qaldym. Sizderdei sportqa umtylǵan jastardy, jasóspirimderdi kórgenime óte qýanyshtymyn. Myna sport kesheni keremet eken. Barlyq jaǵdai jasalǵan. Meniń aitarym, maqsatqa jetý jolynda eńbek, tabandylyq óte mańyzdy. Osy qaǵidany esten shyǵarmai, elimizdiń Týyn álemdik arenalarda jelbiretýlerińizge tilektespin», - dedi ol.
Eske salaiyq, Qobda jáne Jaryq aýyldarynda tasqyn kezinde sý astynda qalǵan úilerdiń ornyna jańadan 147 úi salyndy.
