Foto: almaty.tv
Iran tóńireginde shielenistiń saqtalýyna bailanysty Qazaqstannyń Syrtqy ister ministrligi Qazaqstan azamattaryna jaǵdai turaqtalǵanǵa deiin Iranǵa barýdan ýaqytsha bas tartýdy usyndy, dep habarlaidy Qazaqstan Syrtqy ister ministrligi.
"Qazirgi ýaqytta Iran aýmaǵynda júrgen Qazaqstan azamattaryna elden múmkindiginshe shyǵyp ketýdi, sondai-aq qaýipsizdik sharalaryn barynsha saqtaýdy, qyraǵylyq pen saqtyq tanytýdy, jańalyqtardy qadaǵalap otyrýdy jáne jergilikti bilik organdarynyń usynymdaryn múltiksiz oryndaýdy usynamyz.
Sonymen qatar Qazaqstan azamattaryn Taiaý Shyǵys elderine saparlardy josparlaý barysynda qazirgi jaǵdaidy jáne onyń kúrdelilený qaýpin nazarǵa alyp, jaýapkershilikpen qaraýǵa shaqyramyz", - delingen ministrlik habarlamasynda.
Qazaqstannyń Irandaǵy diplomatiialyq mekemeleri shtattyq rejimde jumys istep tur.
Qosymsha ári jedel aqparat alý úshin Iranda júrgen Qazaqstan azamattary men olardyń Qazaqstandaǵy týystary úshin bailanys jelileri ashyldy.
Esterińizge sala keteiik, 20 aqpanda Vashingtonda ótken Beibitshilik keńesiniń alǵashqy otyrysynda sóz sóilegen Donald Tramp "álem jurtshylyǵy Iranǵa ne bolatynyn 10 kún ishinde biledi" dep málimdegen edi.
Keiinirek Donald Tramp Tegeran iadrolyq baǵdarlamasynan bas tartpasa, Iranǵa qarsy joiqyn soqqy berýge daiyn ekenin óz keńesshilerine aitty.
Sondai-aq Izraildiń Iranmen yqtimal soǵysqa daiyndalyp jatqany týraly habarlama tarady. Eger AQSh Iranǵa shabýyl jasasa, Iran buǵan jaýap retinde Izrailge qarsy shabýyl jasaidy degen boljam jasalyp otyr.
