Kárim Másimov qazirgi tańda kólik infraqurylymy «Nurly jol» jáne ózge de júzege asyp jatqan salalyq baǵdarlamalar arqyly damyp jatqanyn atap ótti. Óńirdiń, ásirese, tranzittik áleýetin eskeresek, oblystaǵy mańyzdy kólik jobalarynyń biri «Oral – Tasqala – RF shekarasy» avtojoldarynyń qaita jóndelýi bolyp esepteledi.
Sonymen qatar, Premer-ministr batys óńirde aýqymdy kólik infraqurylymy jobalaryn júzege asyrýmen qatar, qoǵamdyq kólik qozǵalysyn qamtamasyz etetin jergilikti mańyzy bar avtomobil joldarynyń qurylysy men tehnikalyq qyzmet kórsetýde birqatar problemanyń bar ekenin aitty.
Batys Qazaqstan oblysy respýblikamyz boiynsha avtomobil joldarynyń jai-kúii jaǵynan sońǵy orynda tur. Munda joldardyń jalpy kóleminiń 74% nashar jaǵdaida.
Premer-ministr Investitsiialar jáne damý ministrligine Batys Qazaqstan oblysynyń ákimdigimen jáne múddeli memlekettik organdarmen birlese otyryp keńeste aitylǵan usynystardy júzege asyrý úshin birqatar tapsyrma berdi. Sonymen qatar, Qarjy ministrligine, Investitsiialar jáne damý ministrligine oblystyq jáne aýdandyq mańyzy bar avtomobil joldaryn qaita jańartýǵa jáne jóndeýge qosymsha qarjy bólý týraly usynystar ázirleýdi tapsyrdy.
Aita keteiik, oblystaǵy avtomobil joldarynyń uzyndyǵy 6 530 shaqyrymdy quraidy, onyń ishinde respýblikalyq mańyzy bar joldar – 1392 shaqyrym, jergilikti mańyzǵa ie joldar – 5137 shaqyrym. 2016 jylǵa arnalǵan qarjylandyrýdyń jalpy kólemi – 16 mlrd 461 teńge.
Tutastai alǵanda, elimizdegi avtomobil joldary «Nurly jol» memlekettik baǵdarlamasy aiasynda jańartylyp, jóndelip jatyr.
Osy jyldyń sońyna deiin elimizde 800 shaqyrymǵa jýyq jańa joldy iske qosý josparlanyp otyr.
2016 jyldyń qorytyndysy boiynsha Batys Eýropa – Batys Qytai, Beineý – Aqtaý, Astana – Temirtaý ýchaskesi, Almaty – Qapshaǵai – Taldyqorǵan jáne Astana – Petropavl jobalaryn tolyq aiaqtaý qarastyrylýda.
