QR Bilim jáne ǵylym ministri Ashat Aimaǵambetov Úkimet otyrysynda joǵary bilim bersý salasynda zertteý ekojúiesin qalyptastyrý úshin qandai sharalar qabyldanyp jatqanyn atady, dep habarlaidy QazAqparat.
«Sapany kóterýdiń taǵy bir tetigi – básekelestikti arttyrý. Otandyq ýniversitetterdiń sheteldik úzdik ýniversitettermen tájiribe almasý jáne básekege qabiletti bolýy úshin biz Qazaqstanda sheteldiń aldyńǵy qatarly ýniversitetteriniń filialdaryn ashý boiynsha jumysty bastap kettik. Biyl De Montfort Leicester ýniversitetiniń filialy ashyldy. University of Arizona jáne Arizona State University filialdaryn ashý jumystary júrgizilýde», - dedi vedomstvo basshysy.
Onyń aitýynsha, bul baǵytta taǵy kem degende 5 filial ashý josparlanǵan.
«Joǵary oqý oryndarynyń básekege qabilettiligin arttyrý úshin óńirlerdegi 20 joǵary oqý ornynyń bazasynda akademiialyq artyqshylyq ortalyqtary qurylady. Joba sheńberinde bul ýniversitetterdiń materialdyq-tehnikalyq bazasy, ǵylymi zerthanalary nyǵaitylady jáne bilim baǵdarlamalary jańartylady. Zertteý ekojúiesin qalyptastyrý úshin úsh joǵary oqý ornyn zertteý ýniversitetterine ainaldyrý jospary bar», - dedi Ashat Aimaǵambetov.
Sonymen qatar, ol Nazarbaev Ýniversitetiniń tájiribesi negizinde 2 ozyq oqý ornyn qurý jumystary qarqyndy júrip jatqanyn atady.
«Bolashaqta joǵary oqý oryndarynyń arasyndaǵy básekeni yntalandyrý úshin ýniversitetter tórt liga boiynsha bólinedi. Sáikesinshe, joǵary oqý oryndaryna akademiialyq, basqarý erkindiginiń deńgeileri ózi kiretin liganyń deńgeiine sai beriledi. Sondai-aq eń myqty ýniversitetter memlekettik baqylaýdan bosatylyp, kerisinshe 3 ligaǵa jáne 4 ligaǵa enbegen ýniversitetter memlekettiń baqylaýynda, tekseris ústinde bolady», - dedi ministr.
