Foto: Sn.kz
Qazaqstan Respýblikasynyń Bas prokýratýrasy azamattardy, sonyń ishinde onlain-platformalarda pikir bildirý kezinde zań talaptaryn qatań saqtaýǵa shaqyrdy, dep habarlaidy Ult.kz.
Jalǵan aqparat pen arandatýshylyqqa qatysty eskertý
Vedomstvo málimetinshe, sońǵy ýaqytta jekelegen tulǵalardyń ulttyq dástúrlerge, ádet-ǵuryptarǵa jáne kópǵasyrlyq tarihy bar Naýryz meiramyna qatysty teris pikirlerdi jariia túrde taratý faktileri tirkelgen. Keibiri mundai kózqarastaryn jalǵan dini tujyrymdarmen negizdeýge tyrysqan.
Bas prokýratýra mundai málimdemeler Konstitýtsiia qaǵidalaryna qaishy keletinin, qoǵamdyq kelisimge, ultaralyq jáne dinaralyq tatýlyqqa qaýip tóndiretinin atap ótti.
Jýrnalister men blogerlerdiń jaýapkershiligi
Quzyrly organ BAQ ókilderi, blogerler jáne aqparattyq alań ielerine erekshe nazar aýdardy. Olardyń aitýynsha, jalǵan ári arandatýshylyq sipattaǵy pikirlerge jariia alań berý qoǵam sanasyna teris áser etip, genderlik teńsizdikti nasihattap, áielderdiń ar-namysyna nuqsan keltirýi múmkin.
Osyǵan bailanysty mediany kásibi etika men obektivtilik qaǵidalaryn saqtaýǵa shaqyrdy.
Jaýapkershilik sharalary
Prokýratýra eskertkendei:
– kórineý jalǵan aqparat taratý Qylmystyq kodekstiń 274-babyna sáikes jaýapkershilikke ákeledi;
– ulttyq, dini nemese áleýmettik alaýyzdyqty qozdyrý 174-bap boiynsha aýyr qylmys sanalady;
– sondai-aq dini qyzmet týraly zańnamany buzý ÁQBtK-niń 490-babyna sáikes ákimshilik jaýapkershilikke ákep soǵady.
Bas prokýratýra azamattardy jalǵan aqparat taratpaýǵa, ulttyq qundylyqtardy qurmetteýge jáne qoǵamda alaýyzdyq týǵyzýy múmkin málimdemelerden bas tartýǵa shaqyrdy. Mundai faktiler anyqtalǵan jaǵdaida quqyq qorǵaý organdary zań aiasynda qatań sharalar qabyldaidy.
Aita keteiik, Almatyda ózin imam retinde tanystyrǵan Ahmet Qurbanáli ákimshilik jaýapkershilikke tartyldy. Ol buǵan deiin bergen suhbatynda ekinshi áielin óz shákirtine syilaǵanyn aitqan. Suhbat barysynda ol úshinshi, jas áiel alǵanyn, al ekinshi jubaiy basqa adamǵa turmysqa shyǵýǵa ózi keliskenin málimdegen. Onyń aitýynsha, áieline shákirtteriniń birin tańdaýdy usynǵan.
Osyǵan bailanysty ol Qazaqstan Respýblikasynyń Ákimshilik quqyqbuzýshylyq týraly kodeksiniń 490-baby boiynsha jaýapkershilikke tartylyp, 25 ailyq eseptik kórsetkish (108 125 teńge) kóleminde aiyppul tóleýge mindetteldi. Sonymen qatar, suhbatty jariialaǵan jýrnalist te jaýapkershilikke tartyldy. Politsiia ókilderiniń aitýynsha, zańǵa qaishy mazmundaǵy aqparatty taratý da quqyqbuzýshylyq bolyp sanalady.
Sonymen qatar, “Naýryz – musylmandarǵa jaramaidy” degen er adam ustalǵanyn jazǵanbyz.
