Foto: ashyq derekkózden
Djennifer Lopestiń 10 tamyzǵa josparlanǵan Almatydaǵy ekinshi kontsertine qatysty daý týyndady, dep habarlaidy Ult.kz.
Kúni keshe álemdik juldyzdyń Almatynyń ortalyq stadionynda óner kórsetetini resmi túrde habarlanǵanymen, bul josparǵa «Qairat» fýtbol klýby óz talaptaryn bildirdi. Klýb ókilderiniń aitýynsha, kontsert ótedi dep belgilengen kúni — 10 tamyzda — «Qairat» pen «Jeńis» komandalary arasynda resmi match josparlanǵan. Oǵan qosa, 7 jáne 12 tamyzda «Qairat» eýrokýbok oiyndaryna qatysady.
"2025 jylǵy 10 tamyzda Almaty qalasynyń Ortalyq stadionynda kontsert ótkizý týraly buqaralyq aqparat quraldarynda jáne uiymdastyrýshylardyń paraqshalarynda paida bolǵan habarlamalarǵa bailanysty «Qairat» FK atalǵan kúnniń klýbpen kelisilmegenin túsindirý qajet dep sanaidy", - dep jazylǵan fýtbol klýbynyń áleýmettik jelidegi resmi paraqshasynda.
«Qairattyń» málimdeýinshe 2025 jylǵy 16 mamyrda «Qairat» FK Almaty qalasynyń Sporttyq nysandar direktsiiasynan Ortalyq stadiondy mádeni sharaǵa aldyn ala brondaý týraly resmi habarlama aldy. Jaýap retinde resmi hatta (20.05.2025 jylǵy shyǵys № 994-03101) klýb QR Chempionaty Premer-ligasynyń bekitilgen sporttyq kúntizbesine, sondai-aq «Qairat» fýtbol klýbynyń eýrokýbok aiasyndaǵy halyqaralyq mindettemelerine bailanysty kórsetilgen merzimde stadiondy paidalanýǵa bolmaitynyn habarlady.
"Respýblikalyq jarys kúntizbesine engen «Qairat» FK — «Jeńis» FK resmi matchy 9 nemese 10 tamyzda stadionda ótedi dep josparlanǵan. Sonymen qatar 7 jáne 12 tamyzda komanda eýrokýbokqa qatysady. Osyǵan bailanysty stadion ÝEFA talaptaryna sáikes mindetti túrde daiyndalady. Bul kúnderi basqa sharalardy ótkizýge bolmaidy", -dep otyr klýb.
Joǵaryda aitylǵandardy eskere otyryp, «Qairat» FK resmi túrde dáleldi bas tartý jiberilgen kúni kontsert ótkizetini týraly jariia habarlandyrýǵa tańǵalǵanyn jetkizdi deidi qairattyqtar.
"Klýb mádeni bastamalardy qurmetteidi ári dialogqa ashyq. Biz Ortalyq stadiondy paidalaný kestesin ázirleýde barlyq múddeli taraptyń odan ári syndarly ózara áreketin kútemiz", -dep sózin qorytyndylady.
