Foto: ashyq derekkóz
Premer-ministrdiń orynbasary – ulttyq ekonomika ministri Serik Jumanǵarin Dúniejúzilik bank tobynyń ókilderimen 2026–2031 jyldarǵa arnalǵan Qazaqstanmen áriptestiktiń jańa negizdemelik strategiiasy boiynsha konsýltatsiialyq kezdesý ótkizdi, dep habarlaidy Ult.kz.
Kezdesýdi ashqan vitse-premer ekijaqty yntymaqtastyqtyń strategiialyq mańyzyn atap ótip, 2031 jylǵa deiingi ózara is-qimyldyń basym baǵyttaryn aiqyndaityn qujatty ázirlegeni úshin rizashylyǵyn bildirdi. Onyń aitýynsha, usynylǵan strategiia reformalardy saraptamalyq qoldaý, qarjylandyrý jáne birlesken bastamalar arqyly iske asyrýǵa berik negiz qalaidy.
Basym baǵyttar
Jańa strategiia jobasynda kólik jáne tsifrlyq bailanysty damytý, sý jáne energetika sektorlaryndaǵy qyzmet sapasyn arttyrý, qarjy naryǵyn jetildirý, jeke investitsiiany yntalandyrý, klimattyq saiasatty kúsheitý jáne jańartylatyn energiia kózderin keńinen engizý sekildi baǵyttar qamtylǵan. Bul basymdyqtar Qazaqstannyń áleýmettik-ekonomikalyq damý strategiialarymen úilesedi.
Dúniejúzilik bank aldaǵy alty jyl ishinde jyl saiyn 1 mlrd dollarǵa deiin qarjylandyrýǵa daiyn ekenin bildirdi. Vitse-premerdiń aitýynsha, bul jeke sektordy nyǵaitýǵa, infraqurylymdy damytýǵa jáne ekonomikanyń básekege qabilettiligin arttyrýǵa qosymsha múmkindik beredi. Sondai-aq reformalardy taldamalyq súiemeldeý Úkimet pen Bank arasyndaǵy birlesken Ekonomikalyq zertteý baǵdarlamasy aiasynda jalǵasady.
Aldyńǵy strategiianyń nátijeleri
Kezdesýde 2020–2025 jyldarǵa arnalǵan aldyńǵy strategiianyń qorytyndylary shyǵaryldy. Osy kezeńde jalpy somasy 4,2 mlrd dollardy quraityn 14 joba júzege asyryldy. Olardyń qatarynda «Batys Eýropa – Batys Qytai» halyqaralyq tranzittik dálizin damytý, «Almaty – Qorǵas» avtojolyn jańǵyrtý, irrigatsiialyq jáne drenajdyq júielerdi qaita qurý jobalary bar.
Dúniejúzilik banktiń Qazaqstan men Túrkimenstandaǵy turaqty ókili Andrei Mihnev ótken kezeń pandemiia jáne ózge de syrtqy syn-qaterlerge qaramastan, birlesken jumystyń naqty nátijeler bergenin atap ótti. Onyń aitýynsha, kólik jobalary nátijesinde 5 millionnan astam adam úshin bailanys jaqsaryp, jol júrý ýaqyty aitarlyqtai qysqarǵan, kólik shyǵyndary 35%-ǵa tómendegen. 1 200-den astam turaqty jumys orny qurylǵan.
Shaǵyn jáne orta biznesti qoldaý aiasynda myńnan astam kásiporynǵa granttyq jáne konsýltatsiialyq kómek kórsetildi. 175 startap 41 mln dollar kóleminde satylym jasap, 16 mln dollar investitsiia tartqan.
Irrigatsiialyq infraqurylymdy jańǵyrtý 92 myń gektar jerdegi sý paidalaný tiimdiligin arttyryp, 60 myń fermerdi qosa alǵanda 94 myń sý paidalanýshynyń jaǵdaiyn jaqsartýǵa múmkindik bergen. 763 shaqyrym arna jańartylyp, agrarlyq sektorda ónimdilik ósken.
Investitsiialyq josparlar
Halyqaralyq qarjy korporatsiiasy (IFC) memlekettik-jekeshelik áriptestik jobalaryn qoldaý jáne jeke investorlardy tartý baǵytyndaǵy jumysty jalǵastyrýǵa nietti ekenin málimdedi. Mysal retinde «QTJ» qatysýymen Almaty ainalma temirjolyn qarjylandyrý jobasy ataldy.
Aldaǵy kezeńdegi basymdyqtar qatarynda temirjol infraqurylymyn jańǵyrtý, qarjy institýttary arqyly shaǵyn biznesti qoldaý, agroónerkásiptik keshendi damytý, zamanaýi aýyl sharýashylyǵy tehnikasyn jetkizý jáne astyqty tereń óńdeý jobalaryn qarjylandyrý bar.
Kezdesý qorytyndysynda taraptar strategiia jobasyn aitylǵan usynystardy eskere otyryp pysyqtap, ony Dúniejúzilik banktiń Direktorlar keńesiniń qaraýyna usynýǵa ýaǵdalasty.
